Kwenda na mambu ke na kati

Kwenda na tansi ya malongi

Nkenda ya 35: Jéhovah ke pesa bansiku na yandi

Nkenda ya 35: Jéhovah ke pesa bansiku na yandi

BANGONDA zole na nima ya kubasika na bau na insi Egypte, bantu ya Israele kumaka na nsi ya Ngumba ya Sinaï, to Horeb, disongidila kaka kisika yina Jéhovah tubilaka Moïse na nti yina vandaka kupela tiya. Kisika yina bau tulaka camp na bau.

Moïse tombukaka na ngumba, mpi bantu vandaka kukinga yandi na nsi na yau. Ntangu yandi kumaka na nsongi ya ngumba, Jéhovah zabisaka Moïse lukanu na Yandi: bantu ya Israele fwete lemfukila Yandi mpi kukuma kikanda na Yandi kibeni. Moïse kulumukaka mpi zabisaka bana ya Israele mambu yina Jéhovah zabisaka yandi. Bau ndimaka nde bau talemfukila Jéhovah.

Na ntangu yina, Jéhovah salaka kima mosi ya kuyituka. Yandi tulaka dituti ya ndombe na nsongi ya ngumba mpi makelele ya nzasi wakanaka. Mpi yandi tubilaka bau nde: ‘Mono kele Jéhovah Nzambi na nge yina mebasisa nge na insi Egypte.’ Na nima, yandi pesaka nsiku yai: ‘Nge fwete sambila banzambi yankaka ve, kaka mono.’

Matadi zole

Nzambi pesaka bana ya Israele bansiku uvwa yankaka. Ti matekita yonso, bantu tubaka na Moïse nde: ‘Tuba na beto nge mosi, kansi Nzambi kutubila beto ve, kana ve beto tafwa.’

Na nima, Jéhovah tubaka na Moïse nde: ‘Kwisa tombuka kwaku na nsongi ya ngumba. Mono tapesa nge matadi zole ya nsiku yina bana ya Israele fwete lungisa.’ Moïse tombukaka dyaka ngumba mpi yandi bikalaka kuna bilumbu 40.

Nzambi vandaka na bansiku yankaka mingi sambu na kikanda na yandi. Moïse kusonikaka yau. Nzambi kupesaka yandi mpi matadi yonso zole yina vandaka ti bansiku 10 yina yandi tangaka na ntwala ya bantu yonso mpi yina beto kebinga Bansiku Kumi.

Moize na Ngumba ya Sinaï

Kana Bansiku Kumi kele mfunu, bansiku mingi yankaka yina Nzambi pesaka bana ya Israele kele kaka mfunu kiteso mosi. Mosi na kati ya bansiku yina ketuba mutindu yai: ‘Nge fwete zola Jéhovah na ntima na nge yonso, na luzolo na nge yonso mpi na ngolo na nge yonso.’ Mpi nsiku yankaka kutubaka mutindu yai: ‘Nge fwete zola mfinangani na nge mutindu nge kekudizolaka kibeni.’ Yezu Kristu, Mwana ya Nzambi, kutubaka nde bansiku yai zole kele bansiku ya kuluta mfunu ya Jéhovah kupesaka na bana ya Israele. Na bankenda ya kekwisa, beto talonguka mambu mingi sambu na Mwana ya Nzambi mpi malongi na yandi.

Kubasika 19:1-25; 20:1-21; 24:12-18; 31:18; Kulonga 6:4-6; Levi 19:18; Matayo 22:36-40.



Bangyufula

  • Kiteso ya bangonda zole na nima ya kubasika na Ezipte, bantu ya Izraele kutulaka camp na bo wapi?
  • Yehowa kutubaka nde yandi kezola bantu kusala inki, mpi nki mvutu bo pesaka?
  • Sambu na nki Yehowa kupesaka Moize matadi zole ya nsiku?
  • Katula Bansiku Kumi, inki bansiku yankaka Yehowa kupesaka bantu ya Izraele?
  • Inki bansiku zole Yezu Kristu kutubaka nde yo meluta mfunu?

Bangyufula ya ngika

  • Tanga Kubasika 19:1-25; 20:1-21; 24:12-18; mpi 31:18.

    Inki mutindu bangogo yina kele na Kubasika 19:8 kesadisa beto na kubakisa mambu yina beto fwete sala sambu na kukuma Mukristu yina mekudipesa? (Mat. 16:24; 1 Pie. 4:1-3)

  • Tanga Kulonga 6:4-6; Levi 19:18; mpi Matayo 22:36-40.

    Inki mutindu Bakristu kemonisaka zola na bo na Nzambi mpi na mfinangani na bo? (Mar. 6:34; Bis. 4:20; Roma 15:2)