Kwenda na mambu ke na kati

Kwenda na tansi ya malongi

Nkenda ya 32: Bandola kumi

Nkenda ya 32: Bandola kumi

BENO tala bifwanisu yai. Konso kifwanisu kemonisa ndola mosi na kati ya bandola yina kubwilaka bantu ya Egypte. Na kifwanisu ya ntete beto kemona Aaron kebula nkawa na yandi na Masa Nil. Masa balukaka menga. Bambisi kufwaka mpi masa kukumaka mvindu.

Bandola na bantu ya Egypte

Na nima Jéhovah basisaka makototo na Masa Nil. Yau kotaka bisika yonso: na fulu, na nzungu, na mbeto. Ntangu makototo kufwaka, bantu ya Egypte lokutaka yau mpi insi kumaka na nsudi ya mbi.

Na nima, Aaron, kubulaka nkawa na yandi na ntoto mpi mfututu kumaka bambembele. Yau yangisaka bantu yonso na bambisi. Yau vandaka ndola ya tatu.

Bandola yankaka yina kulandaka kubwilaka kaka bantu ya Egypte kansi bana ya Israele ve. Ndola ya iya vandaka banzinzi mingi yina kotaka na banzo yonso ya bantu ya Egypte. Ndola ya tanu kufwaka bambisi mingi ya bantu ya Egypte.

Na nima Aaron bakaka mfututu mpi losaka yau na mupepe. Yau basisaka bambuma ya nene na nitu ya bantu mpi bambisi. Yau vandaka ndola ya sambanu.

Na nima Moïse tombulaka diboko na zulu mpi ba mibandanu yantikaka kubula mpi mvula ya matadi yantikaka na kubwa. Matadi ya mutindu yina mebwaka ntete na Egypte.

Ndola ya nana vandaka bampasu. Bampasu ya mutindu yina kumonanaka ntete ve na insi. Yau dyaka bima yonso yina matadi ya mvula bikaka.

Ndola ya uvwa vandaka ya mpimpa. Mpimpa ya ngolo kubwaka na insi bilumbu tatu, kansi bana ya Israele vandaka na nsemo kisika bo vandaka kuzinga.

Na nima, Nzambi songaka bantu ya Israele na kupakula menga ya mwana-nkombo to ya mwana-dimeme na byelo ya banzo na bau. Na nima wanzyo ya Nzambi kulutaka na insi ya Egypte. Ntangu yandi vandaka kumona menga na nzo mosi, yandi vandaka kubika bantu ya nzo yina. Kansi banzo yina vandaka ve na kidimbu yina, wanzyo ya Nzambi vandaka kufwa bana ya ntete ya bantu mpi ya bambisi. Yina vandaka ndola ya 10.

Na nima ya ndola yina ya nsuka, Faraon kupesaka nswa na bana ya Israele na kukwenda. Kikanda ya Nzambi yina vandaka kukinga, yantikaka na kukwenda na mpimpa yina kaka, mpi bau katukaka na insi ya Egypte.

Kubasika bakapu 7 tii na 12.



Bangyufula

  • Sadila bifwanisu ya kele na lutiti yai sambu na kutendula bandola tatu ya ntete yina Yehowa kupesaka bantu ya Ezipte.
  • Inki luswaswanu kuvandaka na kati ya bandola tatu ya ntete ti bandola yina yankaka?
  • Inki kuvandaka ndola ya iya, ya tanu mpi ya sambanu?
  • Tendula ndola ya nsambwadi, ya nana, mpi ya uvwa.
  • Inki Yehowa kusongaka bantu ya Izraele na kusala na ntwala ya ndola ya kumi?
  • Inki kuvandaka ndola ya kumi, mpi nki kusalamaka na nima na yo?

Bangyufula ya ngika

  • Tanga Kubasika 7:19-8:19.

    Ata banganga ya Ezipte kukukaka mpi na kusala bandola zole ya ntete mutindu mosi ti yina ya Yehowa kupesaka bo, inki bo ndimaka na ngolo na nima ya ndola ya tatu? (Kub. 8:14, 15; Mat. 12:24-28)

    Inki mutindu ndola ya iya kumonisaka ngolo ya Yehowa ya kutanina bantu na yandi, mpi kuzaba yo kesalaka nde bansadi ya Nzambi kudiwa nki mutindu ntangu bo takutana ti ‘mpasi ya nene’ yina Biblia kutubilaka na ntwala? (Kub. 8:18, 19; Kus. 7:13, 14; 2 Bans. 16:9)

  • Tanga Kubasika 8:20; 9:3, 6, 10, 11, 14, 16, 23-25; mpi 10:13-15, 21-23.

    Inki bimvuka zole kumonanaka pwelele na Bandola Kumi, mpi dyambu yango fwete pusa beto na kutadila bimvuka yango nki mutindu bubu yai? (Kub. 8:6, 14, 15; 9:14)

    Inki mutindu Kubasika 9:16 kesadisa beto na kubakisa sambu na nki Yehowa mepesaka Satana nzila ya kuvanda tii bubu yai? (Roma 9:21, 22)

  • Tanga Kubasika 12:21-32.

    Inki mutindu nkinsi ya Paki kusadisaka bantu mingi na kuguluka, mpi yo vandaka kifwani ya inki? (Kub. 12:21-23; Yoa. 1:29; Roma 5:18, 19, 21; 1 Kor. 5:7)