Kwenda na mambu ke na kati

Kwenda na tansi ya malongi

Nkenda ya 25: Jakob me kuma na Egypte

Nkenda ya 25: Jakob me kuma na Egypte

JOSEPH kangaka dyaka ve ntima. Yandi basisaka bansadi na yandi yonso. Ntangu yandi bikalaka na bampangi na yandi, yandi yantikaka na kudila. Bampangi na yandi yitukaka mingi sambu na kudila na yandi. Na nsuka, yandi tubaka nde: ‘Mono yandi yai Joseph. Keti tata kele dyaka na luzingu?’

Bampangi na yandi yitukaka mingi mpi bau monaka ve kima ya kutuba. Bau vandaka na boma mingi. Kansi Joseph bingaka bau penepene na yandi mpi yandi tubilaka bau nde: ‘Mono kele mpangi na beno, yina beno tekaka na kimpika na Egypte.’

Mpi Joseph tubaka nde: ‘Beno kumona mbi ve sambu beno tekaka mono, sambu yau kele Nzambi tindaka mono na Egypte sambu na kugulusa bantu. Faraon metula mono mfumu na insi yai yonso. Mpi ntangu yai beno kwenda nswalu na tata na mono mpi beno zabisa yandi nsangu yai. Beno songa yandi, yandi kwisa awa.’

Na ntangu yina, Joseph kubwaka na nkingu ya bampangi na yandi mpi yandi yambaka bau ngolo. Ntangu Faraon kuwaka nde bampangi ya Joseph mekuma, yandi tubaka na Joseph nde: ‘Bau kusosa bapusu-pusu mpi bau kwenda kubaka tata na bau mpi mabuta na bau, na nima, bau kwisa kuvanda awa na Egypte. Mono tapesa bau bima ya kuluta mfunu ya insi yai.’

Bau salaka mutindu yina. Jacob kwisaka na Egypte na dibuta na yandi ya mvimba. Keti beno kemona Joseph na maboko ya tata na yandi?

Dibuta ya Jacob kukumaka nene kibeni. Bantu yonso yina kwisaka na Egypte kuvandaka70, kana beto tanga Jacob, bana na yandi mpi bantekolo na yandi, kansi katula bankento mpi bansadi. Bau bingaka bau bana ya Israele sambu Nzambi balulaka zina ya Jacob na yina ya Israele. Bana ya Israele kukumaka kikanda ya Nzambi mpenza, mutindu beto tamona yo na nima.

Kuyantika 45:1-28; 46:1-27.

Joseph ti dibuta na yandi


Bangyufula

  • Inki kusalamaka ntangu Yozefi kudisongaka na bampangi na yandi?
  • Inki Yozefi kutendudilaka bampangi na yandi na mawete yonso?
  • Inki Farao kutubaka ntangu bo zabisaka yandi nde bampangi ya Yozefi mekuma?
  • Dibuta ya Yakobi yina kukwendaka na Ezipte kuvandaka ti bantu ikwa?
  • Na nki zina bo kumaka kubinga dibuta ya Yakobi, mpi sambu na inki?

Bangyufula ya ngika

  • Tanga Kuyantika 45:1-28.

    Inki mutindu disolo ya Biblia yina ketubila Yozefi kemonisa nde Yehowa lenda balula mambu ya mbi ya bantu kezola kusadila bansadi na yandi na mpila nde yo buta bambuma ya mbote? (Kuy. 45:5-8; Yez. 8:10; Filp. 1:12-14)

  • Tanga Kuyantika 46:1-27.

    Inki kivuvu Yehowa kupesaka dyaka Yakobi ntangu yandi vandaka kukwenda na Ezipte? (Kuy. 46:1-4, NW, noti na nsi ya lutiti.)