Kwenda na mambu ke na kati

Kwenda na tansi ya malongi

Nkenda ya 22: Joseph me kota na boloko

Nkenda ya 22: Joseph me kota na boloko

JOSEPH vandaka kaka na bamvula 17 ntangu bau nataka yandi na Egypte. Ntangu bau kumaka kuna, yandi tekamaka na Potifar, nsadi ya lukumu na nzo ya Faraon, ntotila ya Egypte.

Joseph na boloko

Joseph vandaka kusadila mbote kibeni Potifar. Ntangu yandi kumaka na mvula ya kufwana, Potifar kumisaka yandi mfumu na nzo na yandi. Ebuna sambu na nki Joseph kele na kati ya boloko? Yau kele sambu na nkento ya Potifar.

Joseph vandaka bakala ya kitoko, mpi nkento ya Potifar sosaka nde yandi kuta bizumba ti yandi. Na kuzabaka nde yau vandaka mbi, Joseph buyaka. Nkento ya Potifar kumonaka mbi mingi kibeni. Ntangu bakala na yandi vutukaka na nzo, yandi kusaka nde: ‘Joseph mesosa na kulala ti mono!’ Potifar kwikilaka nkento na yandi. Yandi wilaka Joseph makasi mingi mpi yandi tulaka yandi na boloko.

Mfumu ya boloko kusukininaka ve na kumona nde Joseph vandaka muntu ya mbote. Yandi tulaka yandi kapita ya bantu yonso ya boloko. Kilumbu mosi, Faraon wilaka bakapita na yandi zole makasi, mosi vandaka kapita ya bansadi ya mesa, yankaka vandaka kapita ya bansadi ya kikuku. Mpi yandi tulaka bau na boloko. Mpimpa mosi, bantu yina zole kulalaka bandosi yina vandilaka bau mpasi na kutendula. Kilumbu yina kulandaka, Joseph tubilaka bau nde: ‘Beno tubila mono bandosi na beno.’ Bau tubilaka yandi yau mpi, na lusadisu ya Nzambi, Joseph kutendudilaka bau bandosi na bau.

Joseph tubaka mutindu yai na kapita ya bansadi ya mesa: ‘Na nima ya bilumbu tatu, Faraon tabasisa nge na boloko mpi nge tavutuka na kisalu.’ Joseph yikaka nde: ‘Ntangu nge tabasika, tubila Faraon mambu na mono, mpi sadisa mono sambu mono basika na kisika yai.’ Kansi na kapita ya bansadi ya kikuku, Joseph tubaka nde: ‘Na nima ya bilumbu tatu, Faraon tafwa nge.’

Mambu kusalamaka kaka mutindu Joseph kutendulaka yau. Na nima ya bilumbu tatu, Faraon fwaka kapita ya bansadi ya kikuku, kansi kapita ya bansadi ya mesa basikaka na boloko mpi yandi vutukaka na kisalu na yandi. Kapita ya bansadi ya mesa kuvilaka Joseph! Yandi tubaka ata kima mosi ve na Faraon mpi Joseph bikalaka kaka na boloko.

Kuyantika 39:1-23; 40:1-23.



Bangyufula

  • Ntangu bo nataka Yozefi na Ezipte, yandi vandaka ti bamvula ikwa, mpi nki kusalamaka ntangu yandi kumaka kuna?
  • Sambu na nki bo kotisaka Yozefi na boloko?
  • Inki mukumba bo pesaka Yozefi na boloko?
  • Na boloko, inki Yozefi kusalaka sambu na kapita ya bansadi ya mesa mpi kapita ya bansadi ya kikuku ya Farao?
  • Inki kusalamaka ntangu bo basisaka kapita ya bansadi ya mesa na boloko?

Bangyufula ya ngika

  • Tanga Kuyantika 39:1-23.

    Sambu Nzambi kupesaka ntete ve ata nsiku mosi ya kusonika yina vandaka kubuyisa bizumba na ntangu ya Yozefi, inki kupusaka yandi na kutina nkento ya Potifare? (Kuy. 2:24; 20:3; 39:9)

  • Tanga Kuyantika 40:1-23.

    Tubila na bunkufi ndosi ya kapita ya bansadi ya mesa mpi ntendula yina Yehowa kupesaka Yozefi. (Kuy. 40:9-13)

    Kapita ya bansadi ya kikuku kulalaka nki ndosi, mpi yo vandaka kutendula inki? (Kuy. 40: 16-19)

    Bubu yai nki mutindu kimvuka ya mpika ya kwikama mpi ya mayele kelandaka nkadilu ya Yozefi? (Kuy. 40:8; Nk. 36:10; Yoa. 17:17; Bis.17:2, 3)

    Inki mutindu Kuyantika 40:20 kesadisa Bakristu na kubakisa mbote mutindu bo fwete tadila bankinsi ya lubutuku? (Lo. 7:1; Mar. 6:21-28)