Kwenda na mambu ke na kati

Kwenda na tansi ya malongi

Nkenda ya 16: Isaac me kwela nkento ya mbote

Nkenda ya 16: Isaac me kwela nkento ya mbote

KETI beno zaba nkento yai ya beno kemona na kifwanisu yai? Zina na yandi kele Rebeka. Yandi kekwisa kukutana ti Isaac. Rebeka tavanda nkento na yandi. Inki mutindu yau kusalamaka?

Abraham, tata ya Isaac, sosaka na kubakila mwana na yandi nkento mosi ya mbote. Yandi zolaka ve nde Isaac kukwela nkento na kati ya bana bankento ya Kana, sambu bau vandaka kusambila banzambi ya luvunu. Yau yina Abraham bingaka nsadi na yandi mpi songaka yandi nde: ‘Kwenda na insi na mono, na kikanda ya batata na mono. Kuna nge tasola nkento sambu na mwana na mono Isaac.’

Nsadi ya Abraham bakaka bakamelo kumi mpi kwendaka. Ntangu yandi kumaka penepene na mbanza yina kikanda ya Abraham vandaka, yandi telemaka penepene na dibula ya masa. Yau vandaka na nkokila, na ntangu yina bankento ya mbanza basikaka sambu na kwisa kubaka masa na dibulu yina. Sambu na yau, nsadi ya Abraham kusambaka Jéhovah nde: ‘Nkento yina tapesa mono masa mpi tapesa bakamelo na mono masa kuvanda yina nge kesola sambu na Isaac.’

Rebeka mekutana ti Isaac

Ntama ve, nsadi monaka Rebeka kekwisa sambu na kubaka masa. Yandi lombaka mwana ya nkento masa ya kunwa. Mwana ya nkento yina kupesaka kaka ve nsadi masa ya kunwa kansi yandi bakaka masa mpi yandi nwisaka bakamelo. Yau vandaka kisalu ya ngolo sambu bakamelo kenwaka masa mingi.

Ntangu Rebeka manisaka na kubaka masa, nsadi yulaka yandi zina ya tata na yandi mpi kana kisika ya kulala fwanaka monana na nzo na bau. Mwana ya nkento kuvutulaka nde: ‘Tata na mono zina na yandi Betuel mpi kisika ya kulala kele na nzo na beto.’ Nsadi vandaka zaba nde Betuel vandaka mwana ya Nahor, mpangi ya Abraham. Yau yina, yandi fukamaka, yandi kembisaka mpi monisaka matondo na yandi na Jéhovah sambu yandi nataka yandi na nzo ya bampangi ya Abraham.

Na mpimpa yina nsadi ya Abraham kusolulaka na Betuel mpi Laban, mpangi ya Rebeka, yandi zabisaka bau kikuma ya kukwisa na yandi. Betuel na Laban kundimaka nde Rebeka kukwela Isaac. Ebuna mwana ya nkento, keti yandi tazola na kukwenda? Yandi tubaka nde: ‘Inga.’ Kilumbu yina kulandaka, Rebeka kukwendaka na nsadi yina na Kana.

Bau kumaka na Kana na nkokila. Rebeka monaka bakala mosi ketambula na nseke. Yau vandaka Isaac. Isaac fwisaka mama na yandi, Sara, bamvula tatu na ntwala mpi yandi vandaka kaka na ntantu sambu na dyambu yina. Kansi ntangu yai, yandi zolaka Rebeka mingi mpi yandi kumaka dyaka na kyese.

Kuyantika 24:1-67.



Bangyufula

  • Pesa zina ya bakala ti ya nkento yai ya kele na kifwanisu.
  • Inki Abrahami kusalaka sambu na kusosila mwana na yandi nkento, mpi sambu na inki?
  • Inki mutindu Nzambi kupesaka mvutu na kisambu ya nsadi ya Abrahami?
  • Ntangu bo yulaka Rebeka kana yandi zolaka kukwelana ti Izaki, inki mvutu yandi pesaka?
  • Inki kima kupesaka dyaka Izaki kyese?

Bangyufula ya ngika

  • Tanga Kuyantika 24:1-67.

    Inki bikalulu ya mbote Rebeka kumonisaka ntangu yandi kutanaka ti nsadi ya Abrahami na kiziba ya masa? (Kuy. 24:17-20; Bing. 31: 17, 31)

    Inki mbandu ya mbote Bakristu lenda baka bubu yai na kutadila mambu yina Abrahami salaka sambu na Izaki? (Kuy. 24:37, 38; 1 Kor. 7:39; 2 Kor. 6:14)

    Sambu na nki beto fwete baka ntangu ya kuyindulula mutindu Izaki kusalaka? (Kuy. 24:63; Nk. 77:13; Filp. 4:8)