Kwenda na mambu ke na kati

Kwenda na tansi ya malongi

Nkenda ya 14: Nzambi yunsaka Abraham

Nkenda ya 14: Nzambi yunsaka Abraham

BENO kemona mambu yina Abraham kele na kusala? Yandi mesimba mbele na maboko. Yau kemonana nde yandi kezola kufwa mwana na yandi. Kansi sambu na nki yandi kezola kufwa yandi? Beto tala ntete nki mpila Abraham na Sara kubutaka mwana yai.

Abraham kepesa Izaki makabu

Nzambi silaka nde yandi tapesa bau mwana mosi. Kana beto tala mutindu bau vandaka minunu yau lungaka kusalama ve. Abraham kundimaka, sambu yandi kwikilaka nde Nzambi lenda sala mambu yina kemonana mpasi. Sambu na yau nki mambu kusalamaka?

Na nima ya lusilu yina ya Nzambi, mvula mosi kulutaka. Na nima, kilumbu mosi ntangu Abraham vandaka na bamvula 100 mpi Sara bamvula 90, bau kubutaka mwana mosi ya bakala, Isaac. Nzambi kulungisaka lusilu na yandi!

Ntangu Isaac kumaka mbuta, Jéhovah yunsaka lukwikilu ya Abraham. Nzambi bingaka yandi nde: ‘Abraham!’ Yandi ndimaka nde: ‘Mono yai!’ Nzambi nde: ‘Baka mwana na nge Isaac, mpi kwenda na ngumba yina mono tasonga nge. Kuna, fwa mwana na nge mpi tambikila mono yandi na kimenga.’

Na ndinga yina, Abraham waka ntantu mingi, sambu yandi vandaka kuzola mwana na yandi mingi. Na ndambu yankaka, keti Nzambi silaka ve nde bana na yandi tazinga na insi ya Kana? Inki mutindu mambu yina zolaka kusalama kana Isaac kufwaka? Abraham kubakisaka ve, kansi yandi lemfukaka na Nzambi.

Ntangu yandi kumaka na ngumba, Abraham kangaka mwana na yandi bansinga mpi tulaka yandi na mesa-kimenga yina yandi salaka. Na nima yandi bakaka mbele sambu na kufwa yandi. Kansi kaka na ntangu yina wanzyo ya Nzambi kubingaka yandi nde: ‘Abraham, Abraham!’ Yandi ndimaka nde: ‘Mono yai!’

Nzambi tubilaka yandi nde: ‘Kusimba mwana ve. Kusala yandi mambi ve. Ntangu yai mono mezaba nde nge kekwikilaka mono, sambu nge mebuyila mono ve mwana na nge mosi.’

Tala lukwikilu ya ngolo yina Abraham kuvandaka na yau! Yandi vandaka kukwikila nde Jéhovah lenda sala mambu yonso, mpi nde yandi lendaka nkutu kufutumuna Isaac. Kansi Nzambi vandaka kuzola ve mpenza lufwa ya Isaac. Yau yina yandi tulaka dimeme ya bakala yina bibongo na yau vandaka ya kukangama na bansinga mpi yandi tubilaka Abraham na kutambikila yandi yau na kisika ya kufwa mwana na yandi sambu na kimenga.

Kuyantika 21:1-7; 22:1-18.



Bangyufula

  • Inki lusilu Nzambi kupesaka Abrahami, mpi nki mutindu Nzambi kulungisaka yo?
  • Mutindu kifwanisu kemonisa yo, inki mutindu Nzambi kuyunsaka lukwikilu ya Abrahami?
  • Inki Abrahami kusalaka, ata yandi kubakisaka ve kikuma yina Nzambi kulombaka yandi na kusala mutindu yina?
  • Inki kusalamaka ntangu Abrahami kubakaka mbele sambu na kufwa mwana na yandi?
  • Lukwikilu ya Abrahami na Nzambi kuvandaka ngolo nki kiteso?
  • Inki Nzambi kupesaka Abrahami sambu na kupesa kimenga, mpi nki mutindu?

Bangyufula ya ngika

  • Tanga Kuyantika 21:1-7.

    Sambu na nki Abrahami kuyotisaka mwana na yandi na kilumbu ya nana? (Kuy. 17:10- 12; 21:4)

  • Tanga Kuyantika 22:1-18.

    Inki mutindu Izaki kumonisaka bulemfu na tata na yandi Abrahami, mpi nki mutindu dyambu yai vandaka kifwani ya dyambu mosi ya mfunu mingi yina tasalama na bilumbu kekwisa? (Kuy. 22:7-9; 1 Kor. 5:7; Filp. 2:8, 9)