Kwenda na mambu ke na kati

Kwenda na tansi ya malongi

Nkenda ya 13: Abraham —Nduku ya Nzambi

Nkenda ya 13: Abraham —Nduku ya Nzambi

MOSI ya bisika yina bantu kwendaka kuzinga na nima ya Mvula ya Ngolo kele Ur. Kisika yina kumaka mbanza mosi ya mfunu, na banzo na yau ya kitoko. Kansi bantu yina vandaka kuzinga kuna vandaka kusambila banzambi ya luvunu. Bau vandaka kusala mutindu yina na Babel. Bantu ya Ur na ya Babel kuswaswanaka mingi na Noé mpi mwana na yandi Sem, bayina vandaka kusambila Jéhovah.

Bamvula 350 na nima ya mvula ya ngolo, Noé kufwaka ya kwikama, kansi yandi fwaka bamvula zole na ntwala ya lubutuku ya muntu yai ya beno kemona na kifwanisu. Nzambi vandaka kuyangalala mingi sambu na muntu yai. Zina na yandi vandaka Abraham mpi yandi vandaka kuzinga na mbanza Ur.

Abraham ketala bambwetete

Kilumbu mosi, Jéhovah songaka Abraham nde: ‘Katuka na mbanza Ur, nge na dibuta na nge sambu na kukwenda na insi yina ya mono tasonga nge.’ Abraham kutubaka inki? Keti yandi lemfukaka? Inga. Yandi kwendaka mpi yandi bikaka bima yonso ya kitoko yina vandaka na mbanza yina ya Ur. Abraham vandaka kulemfuka kaka na Nzambi mpi na yau yandi kumaka nduku ya Nzambi.

Bantu yankaka ya dibuta na yandi kwendaka kumosi ti yandi ntangu yandi bikisaka Ur. Na kati ya bantu yina, tata na yandi Tera, mwana-mpangi na yandi Lot mpi nkento na yandi Sara. Na nima ya bilumbu bau kumaka na mbanza mosi Haran. Tera kufwaka na mbanza yina. Ur kubikalaka ntama.

Na nima ya bilumbu mingi, Abraham na dibuta na yandi kukatukaka na Haran mpi bau kumaka na insi ya Kana. Yau kele na insi yina Jéhovah kutubilaka yandi nde: ‘Tala mono tapesa insi yai na bana na nge.’ Abraham kubikalaka na Kana mpi kuzingaka na batenta.

Nzambi yantikaka kusadisa Abraham, yau yina yandi kumaka na bambisi mingi mpi bansadi mingi kiteso ya nkama. Kansi nkento na yandi Sara vandaka mukobo.

Ntangu Abraham kumaka na bamvula99, Jéhovah pesaka yandi lusilu yai: ‘Nge takuma tata ya makanda mingi.’ Inki mutindu yau lendaka kusalama, sambu Abraham na Sara lutaka mvula ya kubuta bana?

Kuyantika 11:27-32; 12:1-7; 17:1-8, 15-17; 18:9-19.



Bangyufula

  • Bantu ya nki mutindu vandaka kuzinga na mbanza ya Ure?
  • Muntu ya kele na kifwanisu kele nani? Inki ntangu yandi butukaka, mpi yandi zingaka na wapi?
  • Inki Nzambi kusongaka Abrahami na kusala?
  • Sambu na nki Nzambi kubingaka Abrahami nde nduku na yandi?
  • Banani kwendaka kumosi ti Abrahami ntangu yandi katukaka na Ure?
  • Inki mambu Nzambi kusongaka Abrahami ntangu yandi kumaka na ntoto ya Kanana?
  • Inki lusilu Nzambi kupesaka Abrahami ntangu yandi lungisaka bamvula 99?

Bangyufula ya ngika

  • Tanga Kuyantika 11:27-32.

    Inki bangwisana Abrahami ti Loti kuvandaka na yo? (Kuy. 11:27)

    Ata Biblia ketuba nde Tera muntu kukwendaka ti dibuta na yandi na Kanana, inki mutindu beto kezaba nde Abrahami muntu kubongisaka nzyetolo yina, mpi sambu na nki yandi salaka mutindu yina? (Kuy. 11:31; Bis. 7:2-4)

  • Tanga Kuyantika 12:1-7.

    Banani dyaka Yehowa kukotisaka na kuwakana yina yandi salaka ti Abrahami ntangu Abrahami kukotaka na ntoto ya Kanana? (Kuy. 12:7)

  • Tanga Kuyantika 17:1-8, 15-17.

    Inki zina Nzambi kupesaka Abrami ntangu yandi kumaka ti bamvula 99, mpi sambu na inki? (Kuy. 17:5)

    Inki balusakumunu yankaka Yehowa kusilaka Sara? (Kuy. 17:15, 16)

  • Tanga Kuyantika 18:9-19.

    Na Kuyantika 18:19, inki mukumba Biblia kepesa na batata? (Kul. 6:6, 7; Ef. 6:4.)

    Inki mambu Sara kusalaka yina kemonisa nde beto lenda bumba ve ata kima mosi na meso ya Yehowa? (Kuy. 18:12, 15; Nk. 44:22)