Kwenda na mambu ke na kati

Kwenda na tansi ya malongi

Nkenda ya 12: Nzo-zulu ya Babel

Nkenda ya 12: Nzo-zulu ya Babel

BAMVULA mingi lutaka. Bana ya Noé butaka bana, bau yelaka mpi butukaka dyaka mingi. Bantu kukumaka mingi na ntoto.

Na kati ya bantu yina vandaka kuzinga Nimrodi, mwana ya ntekolo ya Noé. Yandi vandaka muntu ya mbi; yandi vandaka kukula, kukanga mpi kufwa bambisi ti bantu. Nimrodi kudikumisaka mpi ntotila sambu na kuyala bantu yankaka. Nzambi vandaka kuyangalala ata fyoti ve sambu na Nimrodi.

Na ntangu yina, bantu vandaka kutuba kaka munoko mosi. Nimrodi vandaka kuzola nde bau bikala bau yonso kisika mosi: mutindu yina yandi lungaka kuvanda na kimfumu na zulu na bau. Beno zaba yandi salaka inki? Yandi tubilaka bau na kutunga mbanza mosi mpi nzo-zulu (tala kifwanisu).

Ngindu yina kuyangidikaka ve Jéhovah Nzambi, yina zolaka nde bantu kupanzana na ntoto ya mvimba mpi kufulusa yau. Kansi bantu tubaka nde: ‘Beto tunga mbanza mosi mpi nzo-zulu yina takuma tii na zulu. Yau tapesa zina na beto lukumu!’ Bau vandaka kuyindula sambu na nkembo na bau kansi ya Nzambi ve.

Nzambi kusukisaka kisalu na bau. Beno zaba nki yandi salaka? Kaka na mbala mosi, Nzambi salaka yonso nde bantu kutuba bandinga ya kuswaswana na kisika ya kutuba ndinga mosi. Batungi vandaka kuwakana dyaka ve. Yau yina bau pesaka mbanza yina zina ya Babel, to Babilone, yina ketendula “Pitakana.”

Na nima, bantu yantikaka na kukatuka na Babel. Konso bantu yina vandaka kutuba ndinga mosi kwendaka kuzinga kisika mosi na ndambu yankaka ya ntoto.

Kuyantika 10:1, 8-10; 11:1-9.

Bansadi ketunga nzo-zulu ya nene


Bangyufula

  • Nimrode kuvandaka nani, mpi nki mutindu Nzambi vandaka kutadila yandi?
  • Kana nge tala kifwanisu, sambu na nki bantu ke na kusala babriki?
  • Sambu na nki Yehowa kusepelaka ve na kisalu na bo ya kutunga?
  • Inki mutindu Nzambi kusukisaka kisalu yina ya kutunga mbanza?
  • Zina ya mbanza yango kuvanda inki, mpi zina yango vandaka kutendula inki?
  • Inki kukuminaka bantu na ntangu Nzambi kuvalangasaka bandinga na bo?

Bangyufula ya ngika

  • Tanga Kuyantika 10:1, 8-10, NW.

    Inki bikalulu Nimrode kuvandaka ti yo, mpi nki lukebisu dyambu yai kepesa beto? (Bing. 3:31)

  • Tanga Kuyantika 11:1-9.

    Inki kima kupusaka bantu na kutunga mbanza yina, mpi sambu na nki bo nungaka ve na kisalu na bo? (Kuy. 11:4; Bing. 16: 18; Yoa. 5:44)