Kwenda na mambu ke na kati

Kwenda na tansi ya malongi

Nkenda ya 30: Moïse na mongo ya Horeb

Nkenda ya 30: Moïse na mongo ya Horeb

KILUMBU mosi, Moïse nataka bitwisi na yandi na mongo ya Horeb. Kuna yandi monaka nti kepela tiya kansi yau vandaka kuzika ve.

Moize na nti ya kepela

Moïse tubaka nde: ‘Yai kele kima ya kuyituka. Mono pusana sambu na kumona mbote.’ Ntangu yandi pusanaka, ndinga mosi kuwakanaka mpi kutubilaka yandi nde: ‘Kupusana dyaka ve, katula basandale na nge sambu kisika ya nge kele, kele ya busantu.’ Nzambi vandaka kutubila yandi mutindu yina na nzila ya wanzyo. Na yau, Moïse kudifikaka luse.

Nzambi tubilaka yandi nde: ‘Mono memona na meso bampasi ya bantu na mono na insi ya Egypte. Mono kekatula bau na bampasi mpi mono ketinda nge sambu na kubasisa bau na insi ya Egypte.’ Ya kyeleka Jéhovah kanaka na kunata bau na ntoto ya kitoko ya Kana.

Kansi Moïse kutubaka nde: ‘Mono kele muntu ya mpamba. Kiyeka yai melunga na mono ve. Kansi kana mono kwenda na Egypte, bana ya Israele tayufula mono nde: “Nani metinda nge?” Ebuna mono tatuba inki?’

Nzambi vutulaka nde: ‘Nge tubila bau mutindu yai: “JEHOVAH, Nzambi ya Abraham, ya Isaac mpi ya Jacob, metinda mono na beno.”’ Mpi Jéhovah kuyikaka nde: ‘Yina kele zina na mono bamvula yonso.’

Moïse kuvutulaka dyaka nde: ‘Kansi, kana bau kundima ve nde nge metinda mono?’

Nzambi kuyufulaka yandi nde: ‘Inki nge kele na yau na maboko?’

Moïse vutulaka nde: ‘Mono kele na nkawa.’

Nzambi kutubilaka yandi: ‘Losa yau na ntoto.’ Moïse losaka yau na ntoto mpi yau kitukaka nyoka. Jéhovah songaka dyaka Moïse kimpa yankaka. Yandi tubilaka yandi nde: ‘Tula diboko na nge na ntulu na nge.’ Moïse kulemfukaka. Ntangu yandi basisaka diboko yau kumaka mpembe bonso mvula ya mpembe. Bantu lungaka kutuba nde yandi vandaka na kimbefo ya wazi. Na nima, Jéhovah pesaka Moïse nswa ya kusala kimpa yankaka. Na nsuka, yandi tubilaka yandi nde: ‘Ntangu nge tasala bimpa yai, bana ya Israele takwikila nde mono metinda nge.’

Na yau, Moïse kwendaka. Ntangu yandi kumaka na bokilo na yandi, Jethro, yandi songaka yandi nde: ‘Pesa mono nswa ya kuvutuka na Egypte, na bampangi na mono, sambu na kutala nki mpila bau kele.’ Jethro kupesaka yandi nzila.

Kubasika 3:1-22; 4:1-20.



Bangyufula

  • Pesa zina ya ngumba ya beto kemona na kifwanisu.
  • Tendula kima ya kuyituka yina Moize kumonaka ntangu yandi kwendaka na ngumba ti bitwisi na yandi?
  • Ndinga ya kukatukaka na nti yina vandaka kupela tiya kutubaka inki, mpi yo vandaka ndinga ya nani?
  • Inki mvutu Moize kupesaka ntangu Nzambi kuzabisaka yandi nde yandi tabasisa bantu ya Izraele na Ezipte?
  • Inki Nzambi kusongaka Moize na kutuba kana bantu kuyula nde nani kutindaka yandi?
  • Inki mutindu Moize zolaka kundimisa bantu nde Nzambi muntu kutindaka yandi?

Bangyufula ya ngika

  • Tanga Kubasika 3:1-22.

    Inki mutindu mambu yina Moize kukutanaka ti yo kepesa beto kivuvu nde ata beto kemona nde beto mefwana ve na kulungisa mukumba mosi ya teokrasi, Yehowa tasadisa beto? (Kub. 3:11, 13; 2 Kor. 3:5, 6)

  • Tanga Kubasika 4:1-20.

    Inki mutindu Moize kusobaka mabanza na yandi na bamvula 40 yina yandi lutisaka na Madiani, mpi nki dilongi bantu yina kezola kubaka mikumba na dibundu lenda baka na mbandu na yandi? (Kub. 2:11, 12; 4:10, 13; Mis. 6:8; 1 Tim. 3:1, 6, 10)

    Kana Yehowa mepesa beto disipline na nzila ya organizasio na yandi, mbandu ya Moize lenda pesa beto nki kivuvu? (Kub. 4:12-14; Nk. 103:14; Baeb. 12:4-11)