Kwenda na mambu ke na kati

Kwenda na tansi ya malongi

Nkenda ya 6: Mwana ya mbote na mwana ya imbi

Nkenda ya 6: Mwana ya mbote na mwana ya imbi

BENO tala ntangu yai Kaina na Abele. Bau zole meyela. Kaina mekuma musadi ya bilanga. Yandi kekuna masangu, bambuma na bandunda.

Kaina ti Abele kepesa bimenga na Nzambi

Abele, yandi kele mutwisi ya mameme. Kutanina bana ya mameme kepesa yandi kyese kibeni. Bana ya mameme mekuma mameme ya nene mpi nswalu Abele meyantika kutanina kibuka ya nene ya mameme.

Kilumbu mosi Kaina na Abele menata kimenga na Nzambi. Kaina menata bima ya mekatuka na bilanga na yandi mpi Abele, mameme ya kitoko kibeni ya kibuka na yandi. Jéhovah kundimaka Abele na kimenga na yandi, kansi yandi buyaka Kaina na kimenga na yandi. Beno zaba sambu na inki?

Yau kele kaka ve sambu kimenga ya Abele kele ya mbote kuluta ya Kaina. Yau kele sambu Abele kele muntu ya mbote, mpi yandi kezolaka Jéhovah mpi mpangi na yandi. Kansi, Kaina, yandi kele muntu ya mbi, mpi kezolaka ve mpangi na yandi.

Yau yina Nzambi ketuba na Kaina na kubalula ntima. Kansi Kaina mebuya. Yandi mewa makasi ya ngolo sambu Nzambi kezola Abele. Na yau Kaina kutuba na Abele nde: ‘beto kwenda na bilanga.’ Ntangu bau mekuma bau zole na kati ya nseke, Kaina kubula ngolo mpangi na yandi mpi kufwa yandi. Tala mambi ya kuluta ngolo.

Kaina ketina na nima ya kufwa Abele

Ata Abele kezinga dyaka ve, kansi Nzambi keyindula yandi kaka. Abele vandaka muntu ya mbote mpi Jéhovah kevilaka ve bantu ya mutindu yina. Kilumbu kele, Jéhovah Nzambi tafutumuna yandi. Ebuna Abele tafwa dyaka ve. Yandi tazinga kimakulu awa na ntoto. Keti yau tavanda ve kyese na kuzabana na bantu bonso Abele?

Kansi Nzambi kendimaka ve bantu ya kefwananaka na Kaina. Yau yina Nzambi kupesaka Kaina ndola sambu yandi fwaka mpangi na yandi. Nzambi kulaka yandi ntama. Ntangu Kaina kwendaka kuzinga na ndambu yankaka, yandi nataka mpangi na yandi mosi ya nkento, mpi yandi kumaka nkento na yandi.

Na nima Kaina na nkento na yandi kubutaka bana. Bana yankaka ya babakala na ya bankento ya Adamu na Eva kukwelaka, mpi bo butaka bana. Na yau ntalu ya bantu na ntoto kumaka mingi. Beto tadila ndambu na kati na bau.

Kuyantika 4:2-26; 1 Yoane 3:11, 12; Yoane 11:25.



Bangyufula

  • Inki kisalu Kaini ti Abele yantikaka na kusala?
  • Inki makabu Kaini ti Abele kupesaka na Yehowa?
  • Sambu na nki Yehowa kundimaka makabu ya Abele, kansi yandi buyaka makabu ya Kaini?
  • Kaini kele muntu ya nki mutindu, mpi nki mutindu Yehowa kumekaka na kusungika yandi?
  • Inki Kaini kusalaka ntangu yandi vandaka ti mpangi na yandi na kilanga?
  • Tendula mambu yina kukuminaka Kaini na nima ya kufwa mpangi na yandi.

Bangyufula ya ngika

  • Tanga Kuyantika 4:2-26.

    Inki mutindu Yehowa kutubilaka pozisio ya kigonsa yina Kaini kuvandaka na yo? (Kuy. 4:7)

    Inki mutindu Kaini kumonisaka nkadilu ya ntima na yandi? (Kuy. 4:9)

    Inki mutindu Yehowa ketadilaka kutyamuna menga ya muntu yina mesala ve ata kima mosi? (Kuy. 4:10; Yez. 26:21)

  • Tanga 1 Yoane 3:11, 12.

    Sambu na nki Kaini kuwaka makasi mingi, mpi nki mutindu dyambu yai kele mbandu mosi ya kekebisa beto bubu yai? (Kuy. 4:4, 5; Bing. 14:30; 28:22)

    Inki mutindu Biblia kemonisa nde ata ntangu bantu yonso ya dibuta na beto kezola ve Yehowa, beto lenda bikala kaka ya kwikama? (Nk. 27:10; Mat. 10:21, 22)

  • Tanga Yoane 11:25.

    Inki kivuvu Yehowa kepesa na yina metala bantu yonso ya kefwa sambu na lunungu? (Yoa. 5:24)