Kwenda na mambu ke na kati

Kwenda na tansi ya malongi

Nkenda ya 9: Noé ke tunga maswa

Nkenda ya 9: Noé ke tunga maswa
Bantu kesaka Noé

NOE vandaka na nkento mosi mpi bana tatu: Sem, Kam na Jafet. Bau tatu vandaka na bankento. Na yau, dibuta ya Noé vandaka na bantu nana.

Kilumbu mosi, Nzambi pesaka Noé kisalu mosi ya meswaswana na bisalu yankaka. Yandi tindaka yandi na kutunga maswa ya nene yina tavanda na bitesu ya nene, kansi yau tavanda bonso nkela ya nene. Maswa yina zolaka kuvanda na ba étage tatu ya kukabisa na masuku. Masuku yina kuvandaka sambu na Noé ti dibuta na yandi, bambisi, mpi sambu na bima ya kudya.

Yau lombaka nde Noé kutula mukubu ya goudron sambu nde masa kukota ve na maswa. Nzambi songaka yandi nde: ‘Tala mono tanokisa mvula ya ngolo-ngolo mpi kufwa ntoto ya mvimba. Bayina yonso tavanda ve na kati ya maswa tafwa.’

Noé na bana na yandi yantikaka na kusala. Kansi bantu yankaka yantikaka na kuseka bau. Ata buna, bau kubikaka ve. Ata muntu mosi ve kukwikilaka Noé ntangu yandi vandaka kutuba mambu yina Nzambi tasala.

Dibuta ya Noé kekotisa bambisi ti madya na kati ya maswa

Kutunga maswa yina kubakaka ntangu mingi sambu yau vandaka nene mpenza. Na nsuka, maswa manaka na kutungama. Na yau, Nzambi songaka Noé na kukotisa bambisi na maswa: zole ya konso mpila, bakala na nkento, mpi nsambwadi ya mpila yankaka. Nzambi tubaka mpi na Noé na kukotisa bandeke ya mpila yonso na maswa. Noé kusalaka kaka bonso Nzambi zolaka.

Na nsuka, Noé na dibuta na yandi kukotaka na maswa mpi Nzambi kangaka kyelo. Na kati, Noé na dibuta na yandi vandaka kukinga. Yindula fyoti kana nge vandaka na lweka na bau, na kukinga. Keti ya kyeleka mvula yina ya ngolo-ngolo zolaka kunoka mutindu Nzambi kutubaka yau?

Kuyantika 6:9-22; 7:1-9.



Bangyufula

  • Dibuta ya Noa kuvandaka ti bantu ikwa? Tanga bazina ya bana na yandi tatu.
  • Inki kima ya kuyituka Nzambi kulombaka Noa na kusala, mpi sambu na inki?
  • Inki mutindu bamfinangani ya Noa vandaka kutadila mambu ya metala maswa ya yandi vandaka kutubila bo?
  • Inki Nzambi kusongaka Noa na kusala sambu na bambisi?
  • Ntangu Nzambi kukangaka kyelo ya maswa, yo lombaka nde Noa ti dibuta na yandi kusala inki?

Bangyufula ya ngika

  • Tanga Kuyantika 6:9-22.

    Inki kusalaka nde Noa kuvanda nsambidi mosi ya mbote ya Nzambi ya kyeleka? (Kuy. 6:9, 22)

    Inki mutindu Yehowa ketadilaka mubulu, mpi nki bupusi dyambu yai fwete vanda ti yo na bansaka ya kulutisila ntangu ya beto keponaka? (Kuy. 6:11, 12; Nk. 11:5)

    Inki mutindu beto lenda landa mbandu ya Noa ntangu Yehowa kepesa beto lutwadisu na nzila ya organizasio na yandi? (Kuy. 6:22; 1 Yoa. 5:3)

  • Tanga Kuyantika 7:1-9.

    Inki mutindu kuzaba nde Yehowa vandaka kubaka Noa yina vandaka muntu ya kukonda kukuka bonso muntu ya lunungu kepesa beto kikesa? (Kuy. 7:1; Bing. 10:16; Yez. 26:7)