Kwenda na mambu ke na kati

Kwenda na tansi ya malongi

 NKENDA YA 103

Mbonana ya Yezu

Mbonana ya Yezu

NA NIMA ya kukwenda ya Pierre na Jean, Maria yina bikalaka yandi mosi, yantikaka na kudila. Mpi na kunyekaka, yandi talaka na kati ya dizyami (tala kifwanisu ya beto meluta). Ebuna, yandi monaka bawanzyo zole bayina yulaka yandi sambu na nki yandi vandaka kudila.

Yandi vutudilaka bau nde: ‘Sambu bau mekatula Mfumu na mono mpi mono zaba ve wapi bau metula yandi.’ Na nima, yandi balukaka mpi monaka muntu mosi. Muntu yina yufulaka yandi nde: ‘Nani nge kesosa?’

Maria yindulaka nde yau vandaka muntu kesalaka na masamba. Mpi mbala yankaka yandi muntu katulaka nitu ya Yezu. Maria tubilaka yandi nde: ‘Kana nge muntu mekatula nitu, tubila mono wapi nge metula yau.’ Kansi muntu yina telamaka na ntwala na yandi vandaka Yezu. Yandi lwataka nitu yina Maria vandaka kuzaba ve. Ebuna, Yezu bingaka yandi na zina na yandi mpi mbala mosi, yandi zabaka nde yau vandaka Yezu. Yandi kwendaka ntinu kuzabisa balongoki nde: ‘Mono memona Mfumu!’

Na kilumbu yau yina kaka, balongoki zole bayina vandaka na ntantu sambu na lufwa ya Yezu, vandaka kukwenda na Emmayus. Muntu mosi kutaka bau. Ntangu bau vandaka kukwenda, muntu yina vandaka kutendudila bau bitini mingi ya Bible yina pesaka bau kikesa. Bau telamaka sambu na kudya. Na ntangu bau vandaka dya, bau zabaka muntu yina: yandi vandaka Yezu mpi na mbala mosi, yandi vilaka. Kaka na ntangu yina, bau kwendaka na Yerusaleme sambu na kuzabisa bantumwa.

Yezu kumonikaka dyaka na Pierre. Na nsangu yina, balongoki yankaka waka kyese mingi na ntima na bau. Na nima balongoki yai zole kwendaka na Yerusaleme mpi bau kutaka bantumwa. Bau songaka bau mutindu Yezu kudisongaka mpi na bau na nzila. Mpi na ntangu bau vandaka kutuba, kima ya ngolo salamaka.

Beno tala kifwanisu. Yezu memonana na kati ya suku yina kangamaka na nsabi. Ya kyeleka balongoki kele na kyese! Yau kele kilumbu ya kyese mpenza! Keti beno lenda tanga mbala ikwa Yezu memonana dezia na balongoki na yandi? Keti mbala tanu?

Ntangu Yezu kumonanaka na bau ntumwa Thomas kuvandaka ve na balongoki yankaka. Na kuwaka nde Yezu monikaka, Thomas tubilaka bau nde yandi takwikila kaka kana yandi kumona Yezu yandi mosi. Bilumbu nana na nima, balongoki kutanaka dyaka na nzo yina vandaka ya kukanga na nsabi, mpi na mbala yai, Thomas vandaka pana. Na mbala mosi, Yezu monanaka mpi Thomas kwikilaka.