Kwenda na mambu ke na kati

Kwenda na tansi ya malongi

 NKENDA YA 111

Toko Yina Kubwaka na Mpongi

Toko Yina Kubwaka na Mpongi

OH! OH! Inki mambu mebwa awa? Bantu zole kekwisa ntinu na toko yai mebwa ngambu na ntoto. Ya ntete kele ntumwa Paul mpi yankaka, Timote. Toko yai ya bakala mekatuka na nela yina kele na zulu mpi mebwa na ntoto.

Kigonsa yai mesalama na Troas. Ntumwa Paul vandaka kulonga balongoki ya mbanza yina sambu yandi fwete katuka pana kilumbu yina landaka. Na kuzabaka nde yandi tamona bau dyaka ve bilumbu mingi, yandi longaka tii na minwi.

Na kati ya bantu yina vandaka kulanda yandi, vandaka na toko mosi na zina ya Eutiche. Yandi vandaka na nela mosi. Eutiche lalaka mpongi ya ngolo mpi kubwaka yantika na etage ya tatu tii na ntoto. Yau yina bantu yonso kele na mawa. Ntangu bau tedimisaka yandi, mwana-bakala vandaka mefwa ntama!

Na kumonaka nde yandi vandaka kuzinga dyaka ve, Paul lalaka na zulu na yandi. Mpi na nima, yandi tubaka na balongoki nde: ‘Beno mona mpasi ve. Yandi kele mbote!’ Yau kele dyambu ya kuyituka! Paul vutulaka yandi na luzingu! Bantu yonso waka kyese.

Ebuna bantu yonso tombukaka mpi dyaka kumosi. Paul landaka kaka na kulonga tii na suka-suka. Na mbala yai, Eutiche kebaka sambu yandi lala dyaka ve! Na nima Paul, Timote na banduku na bau ya nzila, kotaka na maswa. Wapi bau kwendaka?

Ntumwa Paul manisaka nzyetelo na yandi ya tatu sambu na kulonga. Na nzyetelo na yandi, yandi vandaka na Efeze bamvula tatu. Nzyetelo na yandi ya tatu meluta yina ya zole na nda.

Na nima ya kukatuka na Troas, maswa kangaka na Milet. Ntumwa Paul kumonaka mwa ntangu sambu na kubinga bankuluntu ya kimvuka ya Efeze (na lweka ya Milet). Yandi tubilaka bau sambu na mbala ya nsuka. Na nima, maswa kwendaka mpi bau kabwanaka. Bau dilaka mingi sambu na kukabwana yina!

Na nsuka, maswa kumaka na Cezarée. Paul kulumukaka mpi kwendaka kulala na nzo ya longoki Filipe. Ebuna mbikudi Agabus kumaka mpi zabisaka ntumwa nde: bau takanga yandi ntangu yandi takuma na Yerusaleme. Mambu yina kusalamaka. Kansi bau nataka Paul na Cezarée, kuna yandi bikalaka na boloko bamvula zole. Na nima, bau tindaka yandi na Rome sambu na kusamba na tribunal ya ntotila. Beto tala nki mutindu nzyetelo na bau vandaka.