Kwenda na mambu ke na kati

Kwenda na tansi ya malongi

 NKENDA YA 107

Bau Me Fwa Etienne na Matadi

Bau Me Fwa Etienne na Matadi

MUNTU yai ya mefukama awa zina na yandi Etienne. Yandi kele longoki ya kwikama ya Yezu. Kansi tala mambu kebwila yandi ntangu yai! Bantu kelosa yandi matadi ya nene. Sambu na nki bau kemenga Etienne mutindu yai mpi bau kesosa kufwa yandi? Inki mambu kubwaka?

Nzambi sadisaka Etienne na kusala bidimbu ya nkumbwa ya kuyituka. Yau yangidikaka ve bantu yankaka yina vandaka kutubana na yandi na mambu yina yandi vandaka kulonga na tempelo. Kansi bantu waka nsoni sambu Etienne fulukaka na ngangu ya bunzambi mpi yandi monisaka nde bantu yina vandaka kulonga malongi ya luvunu. Na makasi yina, bambeni na yandi kangaka yandi mpi nataka yandi na Sanhédrin. Kuna, bau bingaka batemwe ya luvunu.

Mbuta-nganga yulaka Etienne kana mambu yina vandaka kutuba batemwe vandaka ya kyeleka. Etienne vutudilaka yandi mvutu na kusalaka diskure ya kitoko yina simbamaka na Bible. Na nsuka, yandi tubaka sambu na bantu yina kunyokulaka bambikudi ya Jéhovah. Na nima yandi tubaka: ‘Beno mefwanana na bau. Beno mefwa Yezu, nsadi ya Nzambi, mpi beno kelemfuka ve na bansiku ya Nzambi.’

Na ndinga yina, bamfumu ya mabundu kuwaka makasi mingi mpi kudyaka meno. Kansi Etienne tombulaka meso na zulu, mpi tubaka nde: ‘Mono kemona Yezu ya kutelama na diboko ya kitata ya Nzambi.’ Ebuna, bau tulaka maboko na makutu, bau nwaninaka yandi mpi nangulaka yandi mpi nataka yandi na nganda ya mbanza.

Kuna, bau katulaka bilele na bau mpi pesaka yau na toko mosi Saul na kutala yau. Beno kemona yandi? Na nima, bau losaka Etienne matadi. Etienne fukamaka mpi tubaka nde: ‘Jéhovah, kupesa bau ndola ve sambu na yau.’ Yandi zabaka nde mingi na kati ya bantu yina bulaka yandi kusamaka na bamfumu ya mabundu. Na nima ya ndinga yina, Etienne fwaka.

Kana muntu mosi mesala beno mambi, keti beno kesosaka na kuvutudila yandi yau? Keti beno kelombaka na Nzambi na kupesa yandi ndola? Etienne ti Yezu kusalaka mutindu yina ve. Bau kudimonisaka bantu ya mbote ata na bantu yina kusalaka bau mambi. Bika beto landa mbandu na bau.