Kwenda na mambu ke na kati

Kwenda na tansi ya malongi

 NKENDA YA 87

Yezu na Kati ya Tempelo

Yezu na Kati ya Tempelo

KIFWANISU kemonisa beno toko ya bakala ketuba na balongi ya tempelo ya Yerusaleme. Bau keyituka mingi. Toko ya bakala kele Yezu. Yandi kele na bamvula 12.

Balongi keyituka sambu Yezu kezaba mambu mingi ya metala Nzambi mpi Bible. Kansi sambu na nki bibuti na yandi kele ti yandi ve awa? Bau kele na wapi? Inki mambu keluta?

Joseph vandaka kukwenda konso mvula na nkento na yandi na bana na Yerusaleme sambu na nkinsi ya Pake. Nzila ya Nazareti tii Yerusaleme vandaka nda mingi, sambu na ntangu yina ata voiture, ata train vandaka ve. Bantu mingi vandaka kutambula na makulu. Katuka na Yerusaleme na kukuma na Nazareti bau vandaka lala bilumbu tatu.

Joseph kumaka na dibuta ya bana mingi: baleke ya Yezu ya babakala ti ya bankento. Yau lombaka kutanina bau. Na yau, na mvula yina, Joseph na Maria vutukaka na Nazareti na bana mingi. Mpila bau vandaka kumona ve Yezu na lweka na bau, bau yindulaka nde yandi vandaka na banduku na bau ya nzila. Na nsuka ya kilumbu, ntangu bau telamaka, bau monaka yandi ve. Bonso bau monaka yandi ve na kati ya bantu ya dibuta mpi banduku na bau, bau vutukaka na Yerusaleme sambu na kusosa yandi.

Bau monaka Yezu na tempelo, na kati ya balongi, yandi vandaka kuwa bau mpi kuyufula bau bangyufula. Bau yonso yitukaka sambu na ngangu na yandi. Kansi Maria tubilaka yandi nde: ‘Sambu na nki nge mesala mambu yai? Tata na nge na mono mosi, beto vandaka kudibanza-banza sambu na nge.’

Yezu vutudilaka bau nde: ‘Sambu na nki beno vandaka kusosa mono? Keti beno kezaba ve nde mono fwete vanda na nzo ya Tata na mono?’

Yezu vandaka zola kuvanda na bisika yina yandi lungaka kulonguka mambu mingi ya metala Nzambi. Na Nazareti, yandi vandaka kukwenda konso mposo na balukutakanu ya lusambu. Sambu yandi vandaka kuwidikila mbote, yandi vandaka kuyela nswalu na nzayilu ya Bible. Beto landa mbandu na yandi.