Kwenda na mambu ke na kati

Kwenda na tansi ya malongi

 NKENDA YA 100

Na Masamba ya Getesemane

Na Masamba ya Getesemane

NA NIMA ya kukatuka na suku ya étage, Yezu na balongoki na yandi kwendaka na masamba ya Getesemane, kisika yina bau vandaka kukwenda mbala mingi. Ntangu bau kumaka, Yezu tubilaka bau na kulala ve, kansi na kusamba. Na nima, ntangu yandi pusanaka fyoti, yandi bwaka luse na ntoto mpi yantikaka na kusamba.

Na nima, yandi vutukaka na bantumwa na yandi. Bau vandaka kulala! Mbala tatu, yandi tubilaka bau na kulala ve, kansi konso ntangu yandi vandaka kuvutuka, yandi vandaka kukuta bau ya kulala. Na mbala ya tatu yandi vutukaka, yandi tubilaka bau nde: ‘Inki mpila beno lunga lala na ntangu bonso yai, sambu Mwana ya muntu tapesama na maboko ya bambeni na yandi.’

Kaka na ntangu yandi manisaka na kutuba, bau waka mazu ya bantu mingi. Na mbala mosi, kibuka ya bantu yina vandaka na bambele, banti na tiya kubasikaka! Ntangu kibuka yina pusanaka, muntu mosi lutaka na ntwala na bau mpi kwisaka penepene ya Yezu mpi pesaka yandi beze. Tala kifwanisu. Yau vandaka Judas Iscariote. Sambu na nki yandi pesaka Yezu beze mutindu yina?

Yezu yulaka yandi nde: ‘Judas, keti nge keteka mono na kupesaka mono beze?’ Na yau, beze yina vandaka kidimbu. Yau vandaka kumonisa Yezu na kibuka yina ya bimpumbulu. Yau yina, bambeni ya Yezu kupusanaka penepene sambu na kukanga yandi. Kansi Pierre zolaka ve kubika bantu yina kukwenda na Yezu kukonda kunwana. Yandi basisaka mbele yina yandi nataka mpi bulaka yau muntu mosi yina vandaka na lweka na yandi. Mbele kulutaka na lweka ya ntu ya bakala yina mpi zengaka yandi dikutu ya kitata. Yezu bakaka dikutu ya muntu yina lwalaka mpi belulaka yandi.

Yezu tubaka na Pierre nde: ‘Vutula mbele na nge na kisika na yau. Keti nge kebanza nde mono lenda ve kubondila Tata na mono na kutindila mono bawanzyo mafunda sambu na kusadisa mono?’ Kansi Yezu salaka kima mosi ve sambu yandi zabaka nde ntangu fwanaka sambu yandi kangama na bambeni na yandi. Yandi bikaka nde bau kunata yandi. Beto tala mambu yina kubwilaka yandi.