Kwenda na mambu ke na kati

Kwenda na tansi ya malongi

 NKENDA YA 91

Yezu Ke Longa na Ngumba

Yezu Ke Longa na Ngumba

BENO kemona awa Yezu kelonga na ngumba mosi ya Galilée. Balongoki na yandi mevanda na lweka na yandi. Yandi mesola na kati na bau bantumwa 12. Bantumwa kele balongoki ya mfunu mingi sambu na Yezu. Beno zaba bazina na bau?

Simon Pierre na mpangi na yandi André. Na nima Jacques mpi Jean, bayina kele mpi bampangi. Na kati ya bantumwa kele dyaka na Jacques yankaka mpi Simon yankaka. Bantumwa zole kele na zina ya Judas: Judas Iscariote ti Judas yankaka ya bau kebinga mpi Thadée. Na nsuka Filipe na Nathanaël (ya bau kebinga Barthélemy), mpi Matthieu ti Thomas.

Na mvutuka na bau na Samaria, Yezu yantikaka na kulonga sambu na mbala ya ntete nde: ‘Kimfumu ya zulu mefinama.’ Keti beno kezaba Kimfumu yango? Yau kele luyalu ya Nzambi yina Yezu kele ntotila. Yezu tayala yantika na zulu mpi tanata ngemba na ntoto, yina takuma paladisu na nsi ya luyalu na yandi.

Awa Yezu kelonga bantu mambu mingi ya metadila kimfumu. Yandi ketendula: ‘Tala nki mutindu beno fwete samba: Tata na beto kele na zulu! Bika zina na nge kuvanda na lukumu! Bika Kimfumu na nge kwisa! Bika luzolo na nge kusalama awa na ntoto bonso na zulu!’ Bau kebingaka kisambu yina mpi ‘Kisambu ya Mfumu.’ Bankaka kebingaka yo ‘Tata na Beto.’ Keti beno zaba yau mbote na ntu?

Yezu pesaka dyaka nsiku yai: ‘Yonso ya beno kezola nde bantu kusala yau sambu na beno, beno sala yau mpi na bantu yankaka.’ Keti beno kezolaka nde bantu kuvanda mawete sambu na beno? Na yau, beno vanda na mawete sambu na bantu yankaka. Yau tavanda mbote na kuzinga na ntoto yina takituka paladisu, na ntangu yina bantu yonso tazitisaka nsiku yina.