Kwenda na mambu ke na kati

Kwenda na tansi ya malongi

 NKENDA YA 96

Yezu Ke Belula Bambefo

Yezu Ke Belula Bambefo

YEZU vandaka kutambula na nsi ya mvimba mpi vandaka kubelula bambefo. Nsangu ya bidimbu na yandi ya nkumbwa mwanganaka na bambanza mpi babwala. Yau yina, na ndambu yonso, bantu vandaka kunatila yandi bifwa makulu, bifwa meso mpi bababa na bambefo yankaka mingi. Yandi vandaka kubelula bau yonso.

Yau lutaka bamvula tatu banda pana Yezu bakaka mbotika. Mpi tala, yandi tubaka na balongoki na yandi nde yandi kekwenda na Yerusaleme, mpi kuna bantu tafwa yandi, na nima yandi tafutumuka. Kansi, Yezu fulaka kaka na kubelula bambefo.

Na kilumbu mosi ya Sabbat, Yezu vandaka kulonga. Sabbat kele kilumbu ya kupema sambu na Bayuda. Nkento ya beno kemona awa vandaka mbefo ya ngolo. Yandi vandaka na nkuki bamvula 18, yandi lungaka kutelama ve ya kusungama. Yezu simbaka yandi mpi na mbala mosi, yandi belukaka!

Mambu yina yangidikaka ve bambuta ya mabundu. Mosi na kati na bau tubaka na ndinga ya ngolo nde: ‘Bilumbu kele sambanu sambu na kusala, beno kwisa bilumbu yina sambu na kubeluka, kansi kilumbu ya Sabbat ve!’

Yezu vutulaka nde: ‘Beno kele bantu ya ntima ya mbi. Konso muntu na kati na beno kekangulaka mpunda na yandi na kilumbu ya Sabbat mpi kenataka yau na kunwa masa. Keti yau kele mbote ve nde nkento yai kubeluka na kilumbu ya Sabbat?’ Ndinga yai ya Yezu kuwisaka bambeni na yandi nsoni.

Na nima Yezu na balongoki na yandi kwendaka na Yerusaleme. Na kukatuka na bau na Yeriko, bifwa meso zole kuwaka nde Yezu vandaka kuluta. Bau bokaka nde: ‘Sadisa beto!’

Yezu bingaka bifwa meso mpi yandi yulaka bau nde: ‘Inki beno kezola mono sala sambu na beno?’ Bau vutulaka nde: ‘Sala yonso nde beto kumona dyaka.’ Yezu simbaka meso na bau mpi na mbala mosi, bau monaka! Beno kezaba kana sambu na nki Yezu salaka bidimbu ya nkumbwa yai yonso? Yau kele sambu yandi kezolaka bantu mpi kezolaka nde bantu yonso kwikila na yandi. Na Kimfumu na yandi, ata muntu mosi ve ya ntoto tabela.