Kwenda na mambu ke na kati

Kwenda na tansi ya malongi

 NKENDA YA 81

Bau Ke Tula Ntima na Bau na Nzambi

Bau Ke Tula Ntima na Bau na Nzambi

MAFUNDA mingi ya bantu katukaka na Babilone sambu na kuvutuka na Yerusaleme. Ntangu bau kumaka, bau monaka nde Yerusaleme mebikalaka kaka matiti. Bau fwete tunga yau dyaka.

Kisalu na bau ya ntete vandaka ya kutunga mesa-kimenga. Yau kele kisika ya bau kepesa makabu ya bambisi na Jéhovah. Na nima ya mwa bangonda, bau yantikaka na kutunga tempelo. Na ntangu yina, bambeni yantikaka mpi na kumonana ye yunsaka na kuwisa bantu ya Israele boma sambu bau bikisa na kutunga yau. Na nsuka, ntotila ya mpa ya Baperse basisaka nsiku yina buyisaka kutungama ya nzo ya Jéhovah.

Bamvula mingi lutaka. Na ntangu yai, bamvula 17 meluta yantika bana ya Israele katukaka na Babilone. Ebuna Jéhovah tindaka bambikudi Aggée mpi Zakarie sambu na kupusa bau na kuyantika bisalu ya kutunga tempelo. Bau tulaka ntima na lusadisu ya Nzambi, mpi bau lemfukaka na bambikudi. Bau yantikaka dyaka na kutunga tempelo, ata bau buyisaka bau.

Na ntangu yina, mfumu mosi ya Baperse, Tatenaï basikaka. Yandi sosaka na kuzaba muntu pesaka nswa ya kutunga tempelo. Bana ya Israele tendudilaka yandi nde ntangu bau vandaka na Babilone, Ntotila Sirus tubilaka bau nde: ‘Beno kuvutuka na Yerusaleme mpi beno tunga tempelo ya Jéhovah, Nzambi na beno.’

Tatenaï tindaka mukanda na Babilone sambu na kuzikisa kana Sirus, yina fwaka, pesaka nswa yina. Mvutu sukininaka ve: Inga, yandi pesaka. Mpi ntotila ya mpa ya Baperse pesaka ya yandi nswa nde: ‘Beno bika bana ya Israele kutunga tempelo mpi beno sadisa bau.’ Na nima ya bamvula iya, tempelo manaka na kutunga. Bana ya Israele kuwaka kyese mingi.

Bamvula mingi kulutaka dyaka. Na ntangu yina, bamvula 48 lutaka banda tempelo manaka na kutunga. Bantu ya Yerusaleme vandaka bansukami mpi mbanza na tempelo ya Nzambi vandaka kitoko ve. Kuna na Babilone, Esdras waka nde tempelo kumaka mbi. Keti beno zaba nki yandi salaka?

Yandi kwendaka kumona ntotila ya Baperse, Artaxerxès. Ntotila yina ya mbote vutudilaka yandi makabu mingi sambu na Yerusaleme. Kansi nani lungaka kusadisa Esdras na kunata yau? Yandi kwendaka kukutana na bana ya Israele yina bikalaka na Babilone mpi bantu 6 000 bakaka lukanu ya kufidisa yandi. Bantu yina ya luzolo vandaka na bima mingi ya kunata: wolo, bibende na bima yankaka mingi ya mfunu.

Esdras vandaka kuyindula mingi na ntima sambu nzila vandaka mbote ve. Wolo na bidende yina lungaka kubendila bau miyibi. Sambu na yau, Esdras kutikisaka bantu yonso mpi sambilaka Jéhovah, na kulombaka yandi nde yandi tanina bau na nzila yina ya nda banda Babilone tii Yerusaleme.

Jéhovah taninaka bau. Na nima ya bangonda iya, bau kumaka mbote na Yerusaleme. Keti yina kele ve kidimbu kesonga nde Jéhovah ketaninaka bantu yina ketulaka ntima na bau na yandi?