Kwenda na mambu ke na kati

Kwenda na tansi ya malongi

 NKENDA YA 78

Bisono na Kibaka

Bisono na Kibaka

INKI mambu keluta awa? Ntotila ya Babilone sadisaka nkinsi ya nene sambu na bantu na yandi ya nene funda. Bau vandaka kunwa na makopa ya wolo mpi ya bibende yina bau bakaka na tempelo ya Jéhovah na Yerusaleme. Kansi tala na mbala mosi, misapi monikaka mpi yantikaka na kusonika na kibaka. Bantu yonso waka boma.

Na ntangu yina, Belesasali, mwana ya mwana ya Nebukadenezar, muntu vandaka kuyala. Ntotila na matekita yonso bokaka na ndinga ya ngolo sambu na kubinga bantu ya mayele. Yandi tubilaka bau nde: ‘Muntu yina takuka na kutanga bisono yai mpi kutendudila mono yau, tabaka makabu mingi mpi takuma mfumu ya tatu na kimfumu.’ Kansi ata muntu mosi ve kukaka na kutanga mpi na kutendula yau.

Mama ya ntotila waka mazu mpi kwisaka kukota na nzo ya nkinsi. Yandi tubaka na ntotila nde: ‘Kumona mpasi ve. Kele na muntu mosi na kintinu na nge yina kuzaba banzambi ya basantu. Ntangu nkaka na nge Nebukadenezar vandaka ntotila, yandi tulaka yandi mfumu ya bantu ya mayele yonso. Zina na yandi kele Daniel. Binga yandi mpi yandi tatendudila nge bisono yai.’

Sambu na yau, bau bingaka Daniel mpi yandi kwisaka na ntwala ya ntotila. Na nima ya kubuya na kubaka konso dikabu yina, Daniel tendulaka na Belesasali sambu na nki Jéhovah katulaka kimfumu na maboko ya nkaka na yandi Nebukadenezar. Daniel tubaka nde: ‘Yandi vandaka lulendo mingi. Yau yina Jéhovah pesaka yandi ndola.’

Daniel yikaka nde: ‘Kansi, nge, nge zabaka mambu yina kubwilaka nkaka na nge, mpi ata mutindu yina, nge kele kaka lulendo bonso yandi.’ Nge mebaka makopa na malonga ya tempelo ya Jéhovah mpi nge me nwa na kati na yau. Nge mekembila banzambi ya banti, mpi ya matadi ye mpi nge mekumisa ve Ngangi na beto ya Nene. Yau yina Nzambi metinda diboko sambu na kusonika mambu yai.

Daniel tubaka nde: ‘Tala mambu me sonama: ‘MENE, MENE, TEKEL mpe PARSIN.’

Ntendula na yau, yau yai: ‘MENE: Nzambi metanga bilumbu ya kimfumu na nge mpi metula nsuka na yau. TEKEL: Bau metesa nge na kilo mpi bau memona nde nge kele mfumu ve. PARSIN: Kimfumu na nge mekabana mpi me pesama na Bamedes na Baperse.’

Kaka na ntangu Daniel vandaka kutuba, Bamedes na Baperse vandaka na nzila sambu na kunwanisa Babilone. Mbanza bwaka na maboko na bau mpi Belesasali fwaka. Na yau, ntendula ya bisono yina kulunganaka kaka na mpimpa yina! Kansi, inki mambu zolaka kubwila bantu ya Israele? Beto tala ntete mambu yina kubwilaka Daniel.