Kwenda na mambu ke na kati

Kwenda na tansi ya malongi

 NKENDA YA 73

Ntotila ya Mbote Mpi ya Nsuka ya Israele

Ntotila ya Mbote Mpi ya Nsuka ya Israele

JOSIAS vandaka kaka na mvula nana ntangu yandi kumaka ntotila ya kintinu ya makanda zole. Yandi vandaka ntete mwana ya fyoti yina vandaka na mfunu ya bandongisila na luyantiku ya kimfumu na yandi mpi yandi vandaka na mfunu ya bantu yina mesalaka dezia kisalu yina.

Na nima ya mvula nana ya kimfumu na yandi, Jozias yantikaka na kusosa Jéhovah. Yandi landaka mbandu ya bantotila ya mbote bonso David, Jozafat na Ezekias. Na nima, ntangu yandi yantikaka na kukuma mbuta, Jozias salaka ngolo sambu na kumanisa lusambu ya biteki.

Banda ntama, bantu mingi ya Israele kumaka mbi. Bau vandaka kusadila banzambi ya luvunu. Jozias na bantu na yandi bakaka kisalu ya kumanisa lusambu ya luvunu na nsi. Kisalu yina vandaka ya nene sambu bansambidi ya biteki vandaka mingi. Beno kemona awa Jozias na bantu na yandi bau kepasula biteki.

Na nima, Jozias solaka bantu tatu sambu na kuyidika dyaka tempelo ya Jéhovah. Bau pesaka bau mbongo yina bantu pesaka sambu na bisalu yina. Kansi, na ntangu bau vandaka kusala na bantu yankaka, mbuta-nganga Hilkiah monaka mukanda ya nsiku, yina Jéhovah sonikisaka na Moïse banda ntama. Mukanda yina vilaka bamvula mingi.

Bau nataka mukanda yina na Jozias, mpi Jozias lombaka nde bau kutanga yau na ntwala na yandi. Ntangu ntotila kuwaka yau, yandi monaka nde bantu vandaka kuzitisa ve minsiku ya Jéhovah. Yandi waka ntantu mingi mpi pasulaka bilele na yandi, mutindu beno lenda mono yau awa. Na nima yandi tubaka nde: ‘Jéhovah mewila beto makasi sambu beto kezitisa ve minsiku na yandi yai mesonama na mukanda yai.’

Jozias songaka mbuta-nganga Hilkiah na kusosa nki ndola Jéhovah vandaka kubumbila bau. Hilkiah kwendaka kumona mbikudi ya nkento Huldah. Huldah songaka na Hilkiah na kusonga na Jozias ndinga yai ya Jéhovah: ‘Bampasi tabwila Yerusaleme mpi bantu na yau, sambu bau metina mono, bau mesambila banzambi yankaka mpi nsi mekuma mbi. Sambu na nge Jozias nge mesala mambu ya mbote, bampasi tabwa ve na luzingu na nge.’