Kwenda na mambu ke na kati

Kwenda na tansi ya malongi

 NKENDA YA 43

Josué Me Kuma Ntwadisi

Josué Me Kuma Ntwadisi

MOÏSE zolaka kukota na insi Kana kumosi na bana ya Israele. Yau yina yandi sambaka mutindu yai: ‘Jéhovah, bika mono luta Yurdani mpi kumona insi yina.’ Kansi Jéhovah kutubilaka yandi nde: ‘Imene! Kutubila mono yau dyaka ve!’ Sambu na nki Jéhovah kutubaka mutindu yina?

Yau kele sambu na mambu yina kulutaka ntangu Moïse kubulaka ditadi. Na kilumbu yina, ata yandi, ata Aaron kukumisaka ve Jéhovah. Bau vilaka na kutubila bantu nde Jéhovah muntu kubasisaka masa na ditadi. Sambu na yau, Jéhovah kuzabisaka bau nde bau takota ve na Kana.

Sambu na yau, mwa bangonda na nima ya lufwa ya Aaron, Jéhovah tubaka na Moïse nde: ‘Baka Josué, tedimisa yandi na ntwala ya nganga-Nzambi Eleazar mpi na ntwala ya bantu yonso. Mpi tuba na ntwala na bau yonso nde Josué kele ntwadisi ya mpa.’ Moïse salaka bonso Jéhovah kutubaka. (Tala kifwanisu.)

Na nima Jéhovah tubaka na Josué nde: ‘Vanda kikesa na ngolo. Kele nge muntu takotisa bana ya Israele na Kana, insi ya mono silaka sambu na bau, mpi mono tavanda na nge.’

Na nima ya mwa ntangu, Jéhovah tubaka na Moïse nde yandi tombuka na Ngumba Nebo, na nseke ya Moab. Ntangu yandi kumaka na nsongi, Moïse talaka na simu ya Nzadi Yurdani mpi yandi monaka insi ya kitoko ya Kana. Jéhovah tubilaka yandi nde: ‘Tala ntoto ya mono silaka na kupesa na nkuna ya Abraham, ya Isaac, mpi ya Jacob. Mono ketadisa nge yau kansi nge takota ve kuna.’

Moïse fwaka na Ngumba Nebo. Yandi vandaka na bamvula 120. Yandi vandaka kaka ngolo mpi meso na yandi vandaka kaka mbote. Bantu dilaka Moïse bilumbu mingi. Kansi bau vandaka na kyese ya kuvanda na ntwadisi bonso Josué.

Kutanga 27:12-23; Kulonga 3:23-29; 31:1-8; 14-23; 32:45-52; 34:1-12.