Kwenda na mambu ke na kati

Kwenda na tansi ya malongi

 NKENDA YA 55

Mwana ya Fyoti Ke Sadila Nzambi

Mwana ya Fyoti Ke Sadila Nzambi

TALA mwana ya bakala yai ya kitoko! Zina na yandi kele Samuele. Muntu yai ya ketula yandi diboko na ntu kele mbuta-nganga Eli. Na nima ya mwana, tata na yandi Elkana mpi mama na yandi Hanna. Bau kepesa mwana Samuel na Eli.

Samuel kele kaka na bamvula iya to tanu. Kansi, yandi tabikala na tabernacle ya Jéhovah, na lweka ya Eli mpi ya banganga-Nzambi yankaka. Sambu na nki Elkana na Hanna kepesa mwana na bau ya fyoti sambu na kusadila Jéhovah na nzo-tenta?

Mwa bamvula na ntwala, Hanna vandaka na ntangu mingi. Yau kele sambu yandi vandaka kubuta ve, kansi luzolo na yandi vandaka ya kubuta. Kilumbu mosi, yandi kwisaka na nzo-tenta, mpi yandi sambaka mutindu yai: ‘O Jéhovah, kuvila mono ve! Kana nge pesa mono mwana mosi ya bakala, mono kesila nde mono tatambika yandi na nge sambu yandi sadila nge na luzingu na yandi ya mvimba.’

Jéhovah kuwaka kisambu ya Hanna, mpi Hanna kumaka na divumu; yandi butaka Samuel. Hanna zolaka mwana na yandi mingi mpi yandi longaka yandi mambu ya metala Jéhovah banda kileke na yandi. Yandi tubaka na bakala na yandi nde: ‘Kana mwana kuma mwa mbuta mpi kubika na kunwa mabele, mono tanata yandi na nzo-tenta sambu yandi sadila Jéhovah kuna.’

Hanna na Elkana kusalaka mutindu yina. Samuel, yina kubakaka malongi ya kufwana na bibuti na yandi vandaka na kyese mingi ya kusadila Jéhovah na nzo-tenta. Konso mvula, Hanna na Elkana vandaka kukwisa kusambila na nzo-tenta yina mpi bau vandaka kukwenda kutala yandi. Konso mvula Hanna vandaka kunatila yandi mvwela mosi ya mpa.

Bamvula vandaka kuluta mpi Samuel vandaka kusala kaka na nzo-tenta ya Jéhovah, mpi Jéhovah na bantu vandaka kuzola yandi mingi. Kansi, Hofni na Finehas, bana ya Eli, vandaka bana ya mpamba mpi na bifu ya mbi ya kukolama, yina fwanaka kubebisa bantu yankaka. Eli vandaka na kiyeka ya kubuyila bau na kusala kisalu ya kinganga-Nzambi, kansi yandi salaka yau ve.

Samuel vandaka kulanda ve bambandu ya mbi yina yandi vandaka kumona. Bonso bansambidi ya kyeleka ya Jéhovah kuvandaka ve mingi na ntangu yina, kulutaka bamvula mingi ya Jéhovah tubaka dyaka na bantu ve. Kansi tala mambu yina kukuminaka Samuel ntangu yandi yelaka:

Samuel vandaka kulala na kati ya nzo-tenta, ntangu yandi waka ndinga kebinga yandi. Yandi vutulaka nde: ‘Mono yai.’ Na nima yandi kwendaka ntinu na Eli mpi tubaka nde: ‘Nge mebinga mono, si mono yai.’

Kansi, Eli vutulaka nde: ‘Mono mebinga nge ve, kwenda kulala.’ Samuel kwendaka kulala.

Samuel waka dyaka nde bau bingaka yandi. Yandi telamaka mpi kwendaka ntinu na Eli. Yandi tubaka nde: ‘Nge mebinga mono, mono yandi yai.’ Eli vutulaka nde: ‘Mono mebinga nge ve, kwenda kulala.’ Samuel kwendaka kulala.

Sambu na mbala ya tatu, Samuel waka ndinga kubinga yandi. Yandi vutukaka dyaka na Eli mpi yandi tubaka nde: ‘Mbala yai nge mebinga mono, yo ke mutindu yina ve?’ Ebuna Eli kubakisaka nde Jéhovah muntu vandaka kubinga yandi. Yau yina yandi tubaka na yandi nde: ‘Kwenda kulala mpi kana ndinga kubinga nge dyaka, nge tatuba nde: “Tuba, Jéhovah, sambu nsadi na nge kewa.” ’

Samuel salaka mutindu yina ntangu Jéhovah bingaka yandi dyaka. Na ntangu yina Jéhovah songaka yandi nde yandi talola Eli na bana na yandi. Hofni na Finehas kufwaka na mvita na bantu ya Filisti, mpi ntangu Eli kuwaka mambu yina kusalamaka, yandi bwaka makadi-kadi, nkingu na yandi kubukanaka mpi yandi fwaka. Ndinga ya Jéhovah kulunganaka.

Samuel kukumaka mbuta, mpi yandi vandaka zuzi ya nsuka ya Israele. Ntangu yandi kumaka mununu, bana ya Israele tubilaka yandi nde: ‘Tudila beto ntotila mosi.’ Samuel zolaka ve kulungisa luzolo na bau, sambu Jéhovah muntu kuvandaka ntotila na bau. Kansi Jéhovah tubilaka Samuel nde yandi kuwa ndinga ya bantu.