Kwenda na mambu ke na kati

Kwenda na tansi ya malongi

 NKENDA YA 39

Nkawa ya Aaron

Nkawa ya Aaron

TALA nkawa yai memenisa bintuntu mpi metedisa mabundu. Yau kele nkawa (to nti) ya Aaron. Bintuntu na mabundu kubasikaka na mpimpa mosi kaka! Kimpa yina kusalamaka sambu na inki?

Bana ya Israele vandaka kutambula na nseke bilumbu mingi. Na kati na bau, bantu mingi vandaka kubokuta sambu Moïse vandaka mfumu, to sambu Aaron vandaka mbuta-nganga. Koré vandaka na kati ya bantu yina, na Datan, Abiram mpi bamfumu 250 ya bana ya Israele. Kilumbu mosi, bau yonso kwisaka na Moïse mpi kutubilaka yandi nde: ‘Sambu na nki nge kekuditula mfumu na kati na beto?’

Moïse tubaka na Koré na bantu yina kulandaka yandi nde: ‘Mbasi na suka, beno baka bima ya beto ketudilaka tiya, mpi beno tula ndumbu. Na nima beno takwisa na yau na nzo-tenta ya Jéhovah. Beto tatala nani Jéhovah tasola.’

Kilumbu yango, Koré na bantu 250 yina vandaka kulanda yandi kwendaka na kyelo ya nzo-tenta, kumosi na bantu mingi yankaka yina vandaka kubokuta. Jéhovah vandaka na makasi ya ngolo. Ebuna, Moïse tubaka nde: ‘Beno katuka na banzo ya bantu yai ya mbi. Beno simba ve ata kima na bau mosi.’ Bantu katukaka na lweka ya banzo-tenta ya Koré, Datan na Abiram.

Na nima, Moïse tubaka nde: ‘Tala mpila beno tazabila muntu ya Jéhovah mesola: ntoto tapasuka mpi tazika bantu yai ya mbi.’

Kaka na ntangu Moïse manisaka na kutuba, ntoto pasukaka mpi kuzikisaka banzo-tenta na bima yonso ya Koré, Datan na Abiram. Na kudila na bau, bana ya Israele waka boma ya ngolo mpi tubaka nde: ‘Beto tina, kana ve ntoto tazika beto mpi!’

Koré na bantu na yandi 250, telamaka kaka na ntwala ya nzo-tenta. Ebuna, Jéhovah nokisaka tiya, mpi yau kuyokaka bau. Na nima Jéhovah zabisaka Eleazar, mwana ya Aaron na kubaka bima ya kutudila tiya ya bantu yina kufwaka mpi na kusala yau kapo ya kufikila zikwa. Kapo yina vandaka kidimbu sambu na bana ya Israele sambu bau vila ve nde kaka Aaron na bana na yandi mpamba solamaka sambu na kuvanda banganga-Nzambi ya Jéhovah kansi bantu yankaka ve.

Kansi Jéhovah zolaka kumonisa pwelele nde kaka Aaron na bana na yandi vandaka na nswa ya kuvanda banganga-Nzambi. Yandi tubaka na Moïse nde: ‘Songa na konso mfumu ya kikanda na kunatila nge nkawa na yandi. Sambu na kikanda ya Levi, songa Aaron na kunatila nge nkawa na yandi. Na nima, tula yau yonso na nzo-tenta na ntwala ya sanduku ya ngwakana. Nkawa ya muntu yina mono mesola tabasisa bintuntu.’

Kilumbu kulandaka, ntangu Moïse kwendaka kutala, nkawa ya Aaron kubasisaka bintuntu mpi mabundu ya kutela! Beno mezaba ntangu yai sambu na nki Jéhovah salaka kimpa yina?