Kwenda na mambu ke na kati

Kwenda na tansi ya malongi

 NKENDA YA 41

Nioka ya Kibende

Nioka ya Kibende

NYOKA yai kele na zulu ya nti kele ve nyoka ya kyeleka. Yau kele nyoka ya kibende. Jéhovah kuzabisaka Moïse na kutula nyoka yina na nti sambu bantu kutala yau mpi kubikala na luzingu. Kansi, banyoka yai ya kele na ntoto, kele ya kyeleka. Yau ketatika bantu mpi kepesa bau kimbefo. Sambu na inki?

Yau kele sambu bantu kubokutilaka Nzambi mpi Moïse. Bau tubaka nde: ‘Sambu na nki beno basisaka beto na Egypte sambu na kufwa na ntoto yai ya makanga? Awa mampa kele ve, masa kele ve, mpi beto kele dyaka ve na mfunu ya kudya manna.’

Kansi manna kuvandaka madya ya kitoko. Yau vandaka dikabu ya nkumbwa ya Jéhovah bonso masa na kati ya ntoto ya makanga. Kansi bantu vandaka kuvila mambote yina Nzambi vandaka kusadila bau. Na mbala yai, sambu bau monisaka ve ntonda, Jéhovah tindilaka bau banyoka sambu na kutatika bau, mpi bantu mingi kufwaka.

Na nsuka, bantu kwisaka kutuba na Moïse nde: ‘Beto mesumuka sambu beto mebokuta na Jéhovah mpi na nge. Nge sambila Jéhovah, yandi katudila beto banyoka yai.’

Moïse sambilaka Jéhovah sambu na bana ya Israele. Jéhovah tubilaka yandi na kusala nyoka ya kibende mpi na kutula yau na zulu ya nti sambu konso muntu ya nyoka tatatika, kana yandi tala nyoka yina ya kibende, yandi kugulusa luzingu na yandi. Moïse salaka yau mpi bantu yonso ya nyoka tatikaka, talaka yau mpi kumaka mbote.

Nkenda yai kele na dilongi. Beto yonso mefwanana na mutindu mosi buna ti bana ya Israele yina banyoka kutatikaka. Ya kyeleka, beto yonso kele bantu ya fwete fwa. Inki beno kemona na lweka na beno? Bantu kenuna, kebela, mpi kefwa. Yau kele sambu bibuti na beto ya ntete, Adamu na Eva, kukolamaka na Jéhovah. Kansi Jéhovah mepesa beto nzila sambu beto zinga kukonda nsuka.

Jéhovah tindaka Mwana na yandi Yezu Kristu na ntoto. Yezu kufwaka na zulu ya nti sambu bau fundaka yandi na mambu ya luvunu. Jéhovah pesaka Yezu bonso dikabu sambu na kugulusa beto. Kana beto tala yandi mpi kana beto landa nzila na yandi, beto tabaka luzingu ya mvula na mvula.