Kwenda na mambu ke na kati

Kwenda na tansi ya malongi

 NKENDA YA 40

Masa Basikaka na Ditadi

Masa Basikaka na Ditadi

BAMVULA 10, 20, 30, 39 kulutaka mpi bana ya Israele kuvandaka kaka na ntoto ya makanga! Kansi Jéhovah kuvilaka bau ve. Yandi vandaka kudisa bau manna. Yandi vandaka kutambusa bau na mwini na dituti mpi na mpimpa na tiya. Bamvula yina yonso bilele na bau kupasukaka ve mpi makulu na bau kuvimbaka ve.

Ngonda ya ntete ya mvula ya 40 na nima ya kubasika na bau na insi Egypte kumaka. Bana ya Israele kumaka dyaka na Kades. Na ntwala, bau vandaka kuna bamvula kiteso ya 40, na ntangu Moïse tindaka bantu 12 sambu na kuzikisa insi Kana. Mpangi ya Moïse ya nkento, Miriam kufwaka na Kades. Mpi bonso na mbala yina, mambu bwaka na Kades.

Bana ya Israele vandaka dyaka ve na masa. Bau tombukilaka Moïse. Bau tubaka nde: ‘Beto mefwa. Sambu na nki nge basisaka beto na Egypte sambu na kunata beto na kisika yai ya mpasi mpi bima kemenaka ve? Masangu kele ve, bafige kele ve, mbuma ya nti ya vinu kele ve, grenade kele ve, ata masa ya kunwa mpi kele ve.’

Na yau, Moïse na Aaron kwendaka kusambila na nzo-tenta mpi Jéhovah tubaka na Moïse nde: ‘Kutika bantu kisika mosi. Na nima, na ntwala na bau yonso, tuba na ditadi yina. Masa tabasika muna ya kufwana sambu na bantu yonso mpi bitwisi.’

Moïse kukutikaka bantu yonso mpi yandi tubaka nde: ‘Beno wa beno bantu ketulaka ve kivuvu na Nzambi! Yau kelomba nde Aaron na mono beto basisila beno masa na ditadi yai?’ Na yau, Moïse bulaka ditadi mbala zole na nkawa na yandi. Masa kubasikaka mingi mpi yau lungaka sambu na kunwisa bantu na bitwisi.

Kansi Jéhovah kuwilaka Moïse na Aaron makasi. Keti beno kezaba sambu na inki? Sambu Moïse na Aaron tubaka nde bau bantu tabasisa masa na ditadi. Kansi, Jéhovah muntu kubasisaka masa. Bonso Moïse na Aaron kutubaka mambu ya masonga ve, Jéhovah kutubilaka bau nde yandi tapesa bau ndola. Yandi tubilaka bau nde: ‘Beno takotisa ve kikanda na mono na Kana.’

Bana ya Israele kusukininaka ve na kukatuka na Kades. Ntangu fyoti, bau kumaka na Ngumba Hor. Yau kele kisika yina Aaron kufwaka, na nsongi ya ngumba, ntangu yandi kumaka na bamvula 123. Lufwa na yandi kupesaka bana ya Israele ntantu mingi, mpi bau dilaka yandi bilumbu 30. Mwana na yandi Eleazar kuyingaka yandi bonso mbuta-nganga ya Israele.