Kwenda na mambu ke na kati

Kwenda na tansi ya malongi

 NKENDA YA 51

Luti na Naomi

Luti na Naomi

NA KATI ya Bible kele na mukanda mosi mebingama Luti. Yau kele nkenda ya dibuta mosi ya zingaka na ntangu ya Israele vandaka na bazuzi. Luti vandaka mwana-nkento ya insi ya Moab; yandi vandaka ve muntu ya Israele, kikanda ya Nzambi. Kansi, ntangu Luti zabaka Nzambi ya kyeleka Jéhovah, yandi kangamaka na yandi ngolo. Yau kele nkento mosi ya mununu Naomi muntu kulongaka yandi mambu ya metala Jéhovah.

Naomi vandaka muntu ya Israele. Sambu nzala kumaka na Israele, Naomi kutinaka na insi ya Moab kumosi na bakala na yandi mpi bana na yandi zole ya babakala. Bakala na yandi kufwaka na insi yina. Bana na yandi ya babakala kukwelaka bankento ya Moab, Luti na Orpa. Na nima ya bamvula 10, bana na yandi ya babakala kufwaka mpi. Luti ti bankento zole yina kuvandaka na ntangu mingi kibeni! Naomi salaka inki?

Kilumbu mosi, Naomi bakaka lukanu ya kuvutuka na Israele. Luti na Orpa vandaka kuzola ve na kukabwana na yandi, mpi bau landaka yandi. Ntangu bau kumaka ntama kibeni na nzila, Naomi tubaka na babokilo na yandi nde: ‘Beno vutuka. Konso muntu kukwenda na nzo ya mama na yandi.’

Na nima, Naomi kupesaka bau mbote mpi yandi yambaka bau. Ebuna bankento yonso yantikaka na kudila ngolo sambu bau vandaka kuzola Naomi mingi. Bau tubaka nde: ‘Ve! Beto takwenda na nge na bwala na nge.’ Kansi Naomi vutudilaka bau nde: ‘Beno vutuka na banzo na beno bana na mono. Beno tazinga ya kuluta mbote kuna.’ Orpa vutukaka. Kansi Luti kubikalaka.

Ebuna Naomi tubaka na Luti nde: ‘Tala, Orpa mevutuka. Landa yandi.’ Luti vutudilaka yandi nde: ‘Kutindika mono ve na kukabwana na nge! Mono kelanda nge. Kisika nge takwenda, mono takwenda na nge. Kisika nge tazinga, mono tazinga na nge. Kikanda na nge, tavanda kikanda na mono mpi Nzambi na nge tavanda Nzambi na mono. Kisika nge tafwa, mono mpi tafwa kuna, mpi bau tazika mono kisika yina.’ Naomi monaka nde Luti zolaka kaka kukwenda na yandi, yau yina yandi bikaka na kutuba na yandi.

Bankento yonso zole kumaka na Israele mpi bau tungaka kuna. Luti kusukininaka ve na kukwenda na bilanga, sambu bau kumaka na nsungi ya kukatula orge. Bakala mosi na zina ya Boaz bikaka yandi kukatula orge na bilanga na yandi. Beno zaba nani vandaka mama ya Boaz? Yandi vandaka Rahab ya Yeriko.

Kilumbu mosi, Boaz tubaka na Luti nde: ‘Bau metela mono mambu yonso ya nge mesala na bokilo na nge Naomi. Nge mekudisonga nkento ya mbote sambu na yandi. Mono zaba nde nge mebika tata na nge, mama na nge mpi insi na nge sambu na kukwisa kuzinga na kikanda yai ya nge zabaka ve na ntwala. Bika Jéhovah kusakumuna nge!’

Luti kuvutudilaka yandi nde: ‘Nge kekudisonga muntu ya mbote na mono. Ndinga na nge mepesa mono kikesa mpi mesyamisa mono na ntima.’ Boaz kuzolaka Luti mingi mpi yandi sukininaka ve na kukwela yandi. Naomi kuwaka kyese mingi! Yandi vandaka dyaka na kyese ya kuluta kilumbu Luti na Boaz kubutaka mwana na bau ya ntete, Obed. Obed kumaka nkaka ya David. Beto tatubila mingi sambu na David na bankenda ya kelanda.

Mukanda ya Ruti Ruti.