Kwenda na mambu ke na kati

Kwenda na tansi ya malongi

 NKENDA YA 21

Bampangi ya Joseph Ke Teka Yandi

Bampangi ya Joseph Ke Teka Yandi

TALA nki mutindu mwana yai ya bakala kele na mawa. Zina na yandi Joseph. Bampangi na yandi mekatuka kuteka yandi na bantu yai ya kekwenda na Egypte. Na Egypte, Joseph takuma mpika. Sambu na nki bampangi na yandi kusalaka dyambu yai ya mbi? Yau kele sambu na kimpala na bau.

Jacob vandaka kuzola Joseph ngolo. Kuzola yina kupesaka yandi nswa ya kutungisila yandi mvwela mosi ya kitoko. Na kumonaka nki mutindu tata na bau vandaka kuzola Joseph mingi, bampangi na yandi 10 ya babakala kumaka na kimpala, mpi kumengaka Joseph. Bau vandaka dyaka na kikuma yankaka ya kumengila yandi.

Joseph lalaka ndosi mbala zole. Na konso mbala, bampangi na yandi vandaka kufukama na ntwala na yandi. Ntangu Joseph kutendudilaka bau yau, bampangi na yandi kuwilaka yandi kimpala ya kuluta.

Kilumbu mosi, bampangi na yandi vandaka kudisa mameme ya tata na bau na nseke. Jacob tindaka Joseph na kulanda bau sambu na kuzaba bansangu na bau. Ntangu bampangi na yandi kumonaka yandi na ntama, bau tubaka: ‘Beto fwa yandi!’ Kansi Ruben, mbuta na bau, kuzengaka bau ndinga na kutubaka nde: ‘Ve, beno fwa yandi ve!’ Na kisika ya kufwa yandi, bau kangaka yandi mpi bau losaka yandi na dibulu yina vandaka na masa ve. Na nima, bau fongaka sambu na kutubila nkanu na yandi.

Kansi bantu mingi ya Ismaele vandaka lutila kisika bau vandaka. Yuda tubaka na bampangi na yandi nde: ‘Beto teka yandi na bantu ya Ismaele.’ Mpi bau tekaka yandi. Bau tekaka yandi na bibende 20 ya mbongo. Tala mambu ya mbi mpi ya kufwisa muntu!

Inki bau tubaka na tata na bau? Tala mambu bau salaka: bau fwaka nkombo ya bakala, bau yondikaka mvwela ya Joseph na menga mpi bau tindaka yau na tata na bau. Bau tubaka na yandi nde: ‘Keti yai kele mvwela ya Joseph ve?’

Jacob kumonaka nde yau vandaka yau. Yandi bokaka nde: ‘Mbisi ya makasi medya yandi.’ Yau kele kaka mutindu yina bampangi ya Joseph vandaka kusosa na kukwikidisa yandi. Jacob kudilaka mwana na yandi bilumbu mingi. Kansi Joseph kufwaka ve. Inki kukuminaka yandi kuna na Egypte?