Kwenda na mambu ke na kati

Kwenda na tansi ya malongi

 NKENDA YA 18

Jacob Ke Kwenda na Haran

Jacob Ke Kwenda na Haran

BANANI bantu yai ya Jacob kesolula ti bau? Bau kele bangungudi. Na nima ya kutambula bilumbu mingi, Jacob kutanaka na bau penepene na dibulu ya masa kumosi na mameme na bau. Yandi yulaka bau: ‘Beno kele bantu ya wapi?’

Bau vutulaka nde: ‘Bantu ya Haran.’

Jacob yikaka: ‘Keti beno zaba Laban?’

Bau tubaka: ‘Inga. Tala mpi mwana na yandi ya nkento Rachel kekwisa na mameme na yandi.’ Keti beno kemona Rachel kepusana na kibuka na yandi ya mameme?

Ntangu Jacob monaka Rachel kenata mameme ya ngwasi na yandi Laban, yandi kwendaka kukatula ditadi yina vandaka kufika dibulu ya masa mpi kunwisaka mameme. Na nima, Jacob yambaka Rachel mpi songaka yandi nani yandi vandaka. Na kyese yonso, Rachel kwendaka ntinu kuzabisa tata na yandi Laban.

Laban kuwaka kyese mingi na kuyamba Jacob. Ntangu Jacob kuyulaka na kukwela Rachel, Laban kubuyaka ve. Kansi Laban lombaka nde Jacob kusadila yandi ntete bamvula nsambwadi na ntwala ya kukwela Rachel. Sambu yandi vandaka kuzola Rachel mingi, Jacob kusalaka yau. Kansi keti beno zaba mambu kubwaka kilumbu ya makwela?

Laban kwedisaka mwana na yandi ya ntete Léa na Jacob. Jacob salaka dyaka bamvula nsambwadi sambu na kukwela Rachel. Na ntangu yina, Nzambi vandaka kubuya ve nde bantu kukwela bankento mingi. Kansi ntangu yai, Bible ketuba nde, bakala fwete kwela kaka nkento mosi.