Kwenda na mambu ke na kati

Kwenda na tansi ya malongi

 NKENDA YA 11

Nkongolo ya Ntete

Nkongolo ya Ntete

KETI beno zaba nki Noé salaka ntangu yandi ti dibuta na yandi kubasikaka na maswa? Yandi tambikaka kimenga na Nzambi. Kifwanisu kemonisa beno Noé ke na kutambika kimenga yango. Noé tambikaka na Nzambi bambisi mingi sambu na kutonda yandi na mpila yandi gulusaka dibuta na yandi na mvula ya ngolo.

Keti Jéhovah kundimaka kimenga na yandi? Inga. Mpi Nzambi kusilaka na meso na yandi nde yandi tafwa dyaka ve ntoto na mvula ya mutindu yina.

Ntoto yumaka nswalu-nswalu. Na ntangu yina Noé na dibuta na yandi yantikaka luzingu ya mpa na nganda ya maswa. Nzambi kusakumunaka bau mpi kutubilaka bau nde: ‘Beno buta bana mingi. Beno kuma mingi, beno fulusa ntoto.’

Kansi na bilumbu takwisa na ntwala, kana bantu kuwa nsangu ya mvula ya ngolo, bau lenda kuwa boma ya mvutuka ya ndola ya mutindu yina. Yau yina Nzambi pesaka bau kidimbu mosi yina tayibusaka bau lusilu ya kufwa dyaka ve ntoto na masa. Kidimbu yango kele nkongolo.

Mbala mingi, nkongolo kebasikaka kana mvula menoka mpi ntangu mebasika na nima. Keti beno metalaka ntete bakulere na yau ya kitoko? Tala yai ya kifwanisu.

Lusilu ya Nzambi yau yai: ‘Ata nki mutindu mono tafwa dyaka ve bantu na bambisi na mvula ya ngolo. Mono ketula nkongolo na mono na matuti. Konso ntangu ya nkongolo tamonika na matuti, mono tamona yau mpi mono tayibuka lusilu na mono.’

Yau yina, kana nge memona nkongolo, yau fwete yibusa nge inki? Lusilu yina Nzambi salaka na kufwa dyaka ve ntoto na mvula ya ngolo.