Kwenda na mambu ke na kati

Kwenda na tansi ya malongi

 NKENDA YA 20

Mambu ya Imbi Me Bwila Dina

Mambu ya Imbi Me Bwila Dina

BENO kemona bana bankento yai Dina kekwisa kutala? Mwana ya nkento yai vandaka na kikalulu ya kuvukana ti bana bankento ya insi Kana. Beno keyindula nde mambu ya mutindu yina lenda yangidika tata na yandi Jacob? Beto yibuka dyaka mambu yina Abraham na Isaac vandaka kuyindula sambu na bankento ya Kana.

Keti Abraham vandaka kuzola nde mwana na yandi Isaac kukwela mwana nkento ya Kana? Ikele ve. Keti Isaac na Rebeka vandaka kuzola nde mwana na bau Jacob kukwela nkento ya Kana? Ikele ve. Beno zaba kana sambu na inki?

Sambu bantu ya Kana vandaka kusambila banzambi ya luvunu. Na yau bau vandaka ve na babakala ya mbote to bankento ya mbote, mpi bau vandaka banduku ya mbote ve. Sambu na yau, ntembe kele ve: Jacob zolaka kuvanda ve na kyese na kuwa nde mwana na yandi ya nkento vandaka nduku ya bana bankento ya Kana.

Bonso bau vandaka kuyindula, mambu ya mbi kubwilaka Dina. Keti beno kemona na kifwanisu bakala yai ya Kana ketala yandi? Zina na yandi Sikem. Kilumbu mosi ya Dina kwendaka kutala banduku na yandi, Sikem kukangaka yandi mpi taka na yandi bizumba. Yau vandaka mbi sambu kaka bantu yina mekwelaka kele na nswa ya kuvukisa nitu na bau. Dyambu ya mbi yina salamaka na nitu ya Dina nataka mambu mingi yankaka ya mbi.

Ntangu bampangi ya Dina kuwaka yau, bau waka nganzi mingi. Siméon na Lévi kubakaka bambele na bau mpi bau kwendaka kunwanisa na kintulumukina bantu ya mbanza yina Sikem vandaka kuzinga. Bau na bampangi na bau kufwaka Sikem mpi bantu yankaka. Dyambu yina ya mbi kuyangidikaka Jacob ve.

Sambu na nki mambu kubebaka mutindu yina? Yau kele sambu Dina vandaka na kikalulu ya kuvanda na bantu yina vandaka kulemfuka ve na minsiku ya Nzambi. Beto keba na mpila nde beto landa ve mbandu yina ya mbi.