Kwenda na mambu ke na kati

Kwenda na tansi ya malongi

 NKENDA YA 23

Bandosi ya Faraon

Bandosi ya Faraon

BAMVULA zole kulutaka mpi Joseph vandaka kaka na boloko. Kapita ya bansadi ya mesa kuvilaka yandi. Tala, na mpimpa mosi, Faraon lalaka bandosi zole ya mbikudulu. Inki vandaka ntendula na yau? Na menemene, Faraon bingaka bantu ya mayele yonso mpi yandi tubilaka bau bandosi na yandi, kansi ata muntu mosi ve kutendulaka bandosi na yandi.

Sambu na yau, kapita ya bansadi ya mesa kuyibukaka na nima nde Joseph vandaka. Yandi tubaka na Faraon nde: ‘Ntangu mono vandaka na boloko, kuvandaka na muntu mosi vandaka kutendula bandosi.’ Nswalu, Faraon kubasisaka Joseph.

Faraon tubaka na Joseph nde: ‘Na ndosi na mono ya ntete, mono memona bangombe nsambwadi ya mafuta mpi bangombe nsambwadi ya kukonda. Na nima, bangombe nsambwadi ya kukonda kuminaka bangombe nsambwadi ya mafuta.

‘Na ndosi na mono ya zole, mono memona nti mosi ya masangu na yau vandaka basika masangu nsambwadi ya kufuluka na bankeni na yau. Mpi mono memona masangu yankaka nsambwadi ya kukauka. Mpi tala, masangu yina ya kukauka kuminaka masangu yina ya mbote.’

Joseph tubaka na Faraon nde: ‘Bandosi yonso zole kele kaka na ntendula mosi. Bangombe nsambwadi ya mafuta mpi masangu nsambwadi ya mbote kesonga bamvula nsambwadi. Bangombe nsambwadi ya kukonda mpi masangu nsambwadi ya kukauka kesonga dyaka bamvula nsambwadi yankaka. Tala, bamvula nsambwadi ya ntete, madya tavanda mingi na Egypte, kansi na nima, nzala takota mpi bamvula nsambwadi yankaka.’

Joseph songaka Faraon na nima nde: ‘Sosa na kati ya bantu na nge muntu mosi ya mayele mpi pesa yandi kisalu ya kubumba madya mingi na bamvula nsambwadi ya madya. Sambu nde bantu kufwa ve na nzala bamvula nsambwadi ya nzala.’

Ngindu yina kuyangidikaka Faraon mpi yandi tulaka Joseph sambu na kukutikisa mpi kubumba madya. Sambu na yau, Joseph kumaka muntu ya kuluta mfunu mpi kilandi ya Faraon na Egypte.

Na nima ya bamvula nana, na kati ya nzala, Joseph monaka bantu mingi kwisaka na Egypte. Yau vandaka bampangi na yandi 10 ya bambuta! Tata na bau Jacob kutindaka bau na Egypte sambu na Kana madya vandaka kumonana dyaka ve. Joseph zabaka bampangi na yandi, kansi bau zabaka yandi ve. Keti beno kezaba sambu na inki? Yau kezola kutuba nde Joseph nunaka mpi yandi vandaka kulwata bilele ya kuswaswana.

Na ntangu yina Joseph yibukaka dyaka bandosi na yandi ya kimwana. Yandi monaka na ndosi bampangi na yandi kekwisa kufukama na ntwala na yandi. Mpi yandi zabaka nde Nzambi kutindaka yandi na Egypte ti kikuma. Inki Joseph tasala sambu na bampangi na yandi? Bika beto tala.