Kwenda na mambu ke na kati

Kwenda na tansi ya malongi

 NKENDA YA 19

Bana ya Jacob

Bana ya Jacob

TALA dibuta yai ya nene. Bau kele bana 12 ya Jacob. Jacob vandaka mpi na bana ya bankento. Beto tala mazina ya bana Jacob butaka.

Léa butaka Ruben, Siméon, Lévi na Juda. Rachel vandaka buta ve ntangu yina; yandi vandaka na ntantu mingi. Yau yina yandi pesaka nsadi na yandi Bilah na Jacob. Bilah butaka bana zole, Dan na Neftali. Ntangu Léa monaka nde yandi sukisaka na kubuta, yandi salaka mpi mutindu mosi. Yandi pesaka Jacob nsadi na yandi Zilpa. Zilpa butaka bana zole: Gad na Aser. Na nima Léa butaka dyaka bana zole: Issacar na Zabulon.

Na nsuka, Rachel butaka mwana ya bakala. Yandi bingaka yandi Joseph. Beto tatubila mingi sambu na yandi na balukaya kelanda. Bau yina bana ya Jacob butaka ntangu yandi vandaka zinga na Laban, tata ya Rachel.

Jacob butaka mpi bana bankento. Biblia kepesa beto kaka zina ya mwana mosi na kati ya bana yina ya bankento: Dina.

Kilumbu kumaka yina Jacob bakaka lukanu ya kuvutuka na nsi ya Kana. Yandi kutikisaka dibuta na yandi yonso na mameme mpi bangombe, na nima yandi kwendaka.

Yau lutaka bamvula mingi na nima Jacob na dibuta na yandi kumaka na Kana. Na ntangu yina, Rachel butaka sambu na mbala ya zole mwana ya bakala kaka na nzyetelo. Rachel vandaka buta na mpasi konso mbala mpi yandi fwaka na ntangu yandi vandaka kubuta mwana ya bakala. Jacob bingaka mwana yina na zina ya Benjamin.

Beto vila ve mazina ya bana 12 ya Jacob. Kikanda yonso ya Israele butukaka na bana yina. Mpamba ve, makanda yonso 12 ya Israele kele na bazina ya bana kumi ya Jacob mpi ya bana zole ya Joseph. Isaac zingaka mingi na nima ya lubutuku ya bana yina. Yandi vandaka na kyese mingi na kumona bantekolo na yandi! Beto tala ntangu yai mambu yina bwilaka Dina.