Kwenda na mambu ke na kati

Kwenda na tansi ya malongi

 NKENDA YA 4

Bau Me Kulama na Kilanga ya Eden

Bau Me Kulama na Kilanga ya Eden

TALA ntangu yai mambu ya mebwa. Adamu na Eva mekulama na kilanga ya kitoko ya Eden. Keti beno mezaba kana sambu na inki?

Yau kele sambu bau mesala mambu ya mbi kibeni. Sambu na yau Jéhovah mepesa bau ndola. Keti beno kezaba mambu ya bau mesala?

Bau kululaka nsiku ya Nzambi. Nzambi pesaka bau nswa ya kudya mabundu yonso ya banti ya kilanga. Kansi Nzambi pesaka bau ve nswa ya kudya mabundu ya nti mosi. Kana bau kudya yau, bau tafwa. Sambu nti yina Nzambi vandaka kubumba yau sambu na yandi mosi. Beto mezaba nde yau kele mbi mingi na kubaka kima ya ngani. Kansi nki mambu kusalamaka?

Kilumbu mosi ya Eva kudivandilaka na kati ya kilanga, nyoka mosi kutubilaka yandi. Yai mambu! Nyoka tubilaka Eva na kudya mbuma ya nti yina Nzambi kubuyisaka bau na kudya. Kansi ntangu Jéhovah kugangaka banyoka yandi pesaka bau ve ndinga bonso bantu. Na yau, muntu mosi vandaka kutuba na nima ya nyoka. Nani?

Yau vandaka ve Adamu. Yau monanaka nde yau vandaka kigangwa mosi ya Jéhovah kugangaka ntama kibeni na ntwala ya kusala ntoto. Bigangwa yina kele bawanzyo, mpi beto lenda mona bau ve. Mosi na kati na bau kumaka lulendo. Yandi zolaka kuyala bonso Nzambi. Yandi zolaka nde bantu kulemfukila yandi kansi Jéhovah ve. Wanzyo yina muntu kutubisaka nyoka.

Wanzyo yai kukusaka Eva. Yandi songaka Eva nde kana yandi dya mbuma yina Nzambi kubuyisaka, yandi takituka bonso Nzambi. Eva mpi kwikilaka. Yandi dyaka mbuma, mpi na nima yandi pesaka yau na Adamu, yandi mpi dyaka yau. Adamu na Eva kukolamaka na Nzambi mpi kuvidisaka kisika na bau ya kitoko.

Kansi, kilumbu kele ntoto ya mvimba takituka ya kitoko bonso kilanga ya Eden. Nge tamona na bankenda yina ke na ntwala nki mpila nge lenda vukana na kisalu yina ya kubalula ntoto na paladisu. Ntete beto tala mambu yina kubwilaka Adamu na Eva.