Kwenda na mambu ke na kati

Kwenda na tansi ya malongi

 NKENDA YA 5

Luzingu ya Mpasi Me Yantika

Luzingu ya Mpasi Me Yantika

NA NGANDA ya kilanga ya Eden, Adamu na Eva kumonaka mpasi mingi. Sambu na kudya mbote, yo lombaka nde bau sala ngolo. Na kisika nde banti ya kitoko ya bambuma kumena, banti ya mbi na bansende vandaka kubasika na nzyunga na bau. Tala mambu yina kubwilaka Adamu ti Eva sambu bau kolamaka na Nzambi mpi vidisaka kinduku na bau ti Yandi.

Kima ya kuluta mbi dyaka, Adamu na Eva yantikaka na kufwa. Nzambi kuzabisaka bau nde: kana bau kudya mbuma ya nti yina yandi buyisaka bau, bau tafwa. Sambu na yau, kaka kilumbu bau dyaka mbuma, bau yantikaka na kufwa. Tala buzoba ya kukolama na Nzambi!

Bana yonso ya Adamu na Eva kubutaka na nima ya Nzambi kulaka bau na kilanga ya Eden. Yau ketendula nde bana na bau mpi zolaka kununa mpi kufwa.

Kana Adamu na Eva kulemfukilaka Jéhovah, nga bau zolaka kuzinga kimakulu na ntoto, na kyese yonso. Ata muntu mosi ve zolaka kununa, kubela mpi kufwa.

Luzolo ya Nzambi kele nde bantu kuzinga kimakulu. Kansi kilumbu kele bau tazinga na mutindu yina. Ntoto tavanda paladisu mpi bantu na yau tavanda na nitu ya mbote. Bantu tavutukila kinduku na bau na Nzambi mpi na kati na bau kinduku ya nene tavanda.

Eva mpi vidisaka kinduka na yandi ti Nzambi. Yau natilaka yandi bampasi ya ngolo. Yandi yantikaka kubuta na mpasi ya ngolo. Kukolama na yandi na Jéhovah kunatilaka yandi mpenza ntantu mingi.

Adamu na Eva kubutaka bana mingi ya babakala na ya bankento. Ntangu bau butaka mwana na bau ya ntete, bau pesaka yandi zina Kaina. Bau pesaka mwana na bau ya zole zina Abele. Inki mambu kubwilaka bau? Keti beno zaba yau?