Kwenda na mambu ke na kati

Kwenda na tansi ya malongi

 NKENDA YA 1

Nzambi Me Yantika na Kuganga

Nzambi Me Yantika na Kuganga

BIMA yonso ya kitoko ya beto kele na yau kukatukaka na Nzambi. Yandi salaka ntangu sambu na kupesa beto mwini, ngonda mpi bambwetete sambu na kupesa beto mwese na mpimpa. Nzambi gangaka mpi ntoto sambu beto zinga na zulu na yau.

Kansi ntangu, ngonda, bambwetete na ntoto kele ve bima ya ntete ya Nzambi kugangaka. Keti beno mezaba nki bima yandi gangaka ntete? Nzambi kusalaka ntete bantu ya kufwanana ti yandi. Beto lenda mona ve bantu yai, kaka mutindu beto lenda mona ve Nzambi. Na Bible, bo kebingaka bantu yai bawanzyo. Nzambi kugangaka bawanzyo sambu bau zinga kisika mosi ti yandi na zulu.

Wanzyo ya ntete yina Nzambi gangaka kele mfunu mingi. Yandi vandaka Mwana ya ntete ya Nzambi, mpi yandi salaka ti Tata na yandi. Yandi sadisaka Nzambi na kuganga bima yonso yankaka. Yandi sadisaka yandi na kuganga ntangu, ngonda, bambwetete mpi ntoto.

Na ntangu yina, ntoto vandaka nki mutindu? Na luyantiku ata muntu mosi ve lendaka kuzinga na ntoto sambu nzadi fikaka yau yonso. Kansi Nzambi zolaka nde bantu kuzinga na ntoto. Yau yina yandi yantikaka na kuyidika yau sambu na beto. Inki yandi salaka?

Ntete, ntoto vandaka na mfunu ya mwini. Yau yina yandi salaka ntangu sambu na kupesa mwini na ntoto. Yandi salaka yau na mpila nde mpimpa na ntangu yantika na kulandana. Na nima, Nzambi basisaka ntoto ya kukauka banda na masa.

Na ntangu yina, bima yankaka vandaka ve na zulu ya ntoto; ata bintuntu, ata banti, ata bambisi kuvandaka ve (tala kifwanisu). Mpi ata bambisi ya masa vandaka ve. Kisalu mingi bikalaka na kusala sambu ntoto kuvanda kisika mosi ya kitoko sambu na bambisi na bantu.