Kwenda na mambu ke na kati

Kwenda na tansi ya malongi

 NKENDA YA 3

Adamu na Eva

Adamu na Eva

INKI beto kemona na kifwanisu yai? Beto kemona bakala ya ntete na nkento ya ntete. Nzambi muntu gangaka bau. Beno zaba zina ya Nzambi? Zina na yandi kele Jéhovah. Zina ya bakala Adamu mpi zina ya nkento, Eva.

Tala nki mutindu Jéhovah Nzambi kugangaka Adamu. Yandi bakaka putulu ya ntoto mpi yandi salaka nitu ya muntu ya kukuka. Na nima yandi tulaka mupepe na mbombo ya muntu. Na yau Adamu yantikaka na kuzinga.

Jéhovah Nzambi vandaka na kisalu ya kupesa Adamu. Yandi songaka Adamu na kupesa bambisi yonso bazina. Adamu yindulaka ngolo na ntwala ya kupesa konso mbisi zina yina fwanaka na yandi. Kansi, ntangu muntu vandaka kupesa bambisi bazina, yandi yantikaka na kumona kima mosi. Beno zaba kana inki?

Bambisi yonso vandaka na bankento na bau. Bandjoku ya bakala na bandjoku ya bankento, bantambu ya babakala na bantambu ya bankento. Kansi, Adamu kuvandaka ve na nkento. Yau yina Jéhovah kubwisaka Adamu na mpongi ya ngolo mpi yandi katulaka yandi lubanzi mosi na mupanzi. Na lubanzi yina, yandi sadilaka Adamu nkento.

Yindula fyoti kyese yina Adamu kuvandaka na yau! Mpi nki kyese Eva kuvandaka na yau na kuzinga na kilanga ya kitoko ya mutindu yina! Na ntangu yai bau lungaka kubuta bana mpi kuzinga na kyese yonso.

Jéhovah zolaka nde Adamu na Eva kuzinga kimakulu. Yandi lombaka na bau na kukumisa ntoto ya mvimba bonso kilanga ya Eden. Adamu na Eva kuvandaka na kyese kibeni ntangu bo vandaka kuyindula na kulungisa kisalu yina! Keti nge zolaka kuvanda na kyese na kukumisa ntoto kilanga ya kitoko? Kansi, kyese na bau vandaka ya nkufi. Beto tala sambu na inki.