Kwenda na mambu ke na kati

Kwenda na tansi ya malongi

 NGIUFULA 3

Inki Mutindu Mu Lenda Solula ti Bibuti na Mu?

Inki Mutindu Mu Lenda Solula ti Bibuti na Mu?

SA NA NKI YO KE MFUNU

Kana nge ke wakana mbote ti bibuti na nge, luzingu na nge mpi ta vanda mbote.

NGE ZOLAKA KUSALA NKI?

Yindula diambu yai: Beto kele Kitatu na mpimpa. Geoff, yina ke ti bamvula 17, me manisa bisalu na yandi, mpi nsuka-nsuka yandi kele ya kuyilama sambu na kulutisa mwa ntangu ya mbote! Yandi me kangula TV mpi me kuditandula na kiti ya yandi ke zolaka mingi.

Ebuna Papa me basika na kielo, mpi yandi kele ve na kiese.

“Geoffrey! Sambu na nki nge ke bebisa ntangu na nge na kutala TV; yai ntangu ya nge fwete sadisa leke na nge na kusala badevware na yandi, mpidina ve? Nge ke salaka ve mambu ya bo me songa nge!”

Geof ke kuditubila, na ndinga ya mwa-ngolo nde, “Yandi me yantika diaka.”

Papa me pusana. “Mwana, nge me tuba nki?”

Geoff ke tala na zulu, mpi ke tuba ti mawa, “Kima ve, Papa.”

Papa me wa kibeni makasi. Yandi ke tuba na makasi nde, “Kutubila mu ve mpidina!”

Kana nge vandaka Geoff, nki nge zolaka kusala sambu beno swana ve?

YINDULA FIOTI!

Kusolula ti bibuti na nge kele bonso kunata kamio. Kana nge kutana ti barrage, nge lenda baka nzila ya nkaka.

 MU MBANDU:

Mwana-nkento mosi, zina na yandi Leah, ke tuba nde: “Mu ke kukaka ve kusolula ti papa. Bantangu ya nkaka mu le solula ti yandi mwa fioti, ebuna nge ta wa yandi ke tuba nde ‘Pardo, nge vandaka kutubila mu?’”

LEAH KELE TI BANSOLA KITESO YA TATU.

  1. Kunganina papa na yandi.

    Leah ke ngana nde, “Inki yango, yo ke mfunu! Wa mono!”

  2. Kuyambula kusolula ti papa na yandi.

    Leah me yambula kusolula ti papa na yandi diambu ya yandi ke kutana ti yo.

  3. Kuvingila ntangu ya mbote, mpi kutubila diaka diambu yina.

    Leah ke solula meso na meso ti papa na yandi na nima, to yandi ke tendudila papa diambu yango na mukanda.

Nge zolaka kusonga Leah na kusala nki nsola?

MU MBANDU: Papa ya Leah ke tula ve dikebi—mpi yandi ke bakisa ve kiseku ya Leah. Yo yina kana Leah sala Nsola A, papa lenda kudiyula kana yandi me bela kilau. Yo ke monana nde nsola yai ta pusa ve papa ya Leah na kuwidikila yandi, mpi yo ta monisa ve nde yandi ke zitisa papa mpi ke pesa yandi lukumu. (Baefezo 6:2) Ya kieleka, nsola yai ta natila ve ata muntu mosi mambote.

Kaka mutindu nge fwete bika ve nde barrage kusukisa nzietelo na nge, nge lenda zwa mwaye ya kuwakana ti bibuti na nge

Ata Nsola B kele nsola ya pete kibeni, yo kele ve ya mayele. Sambu na nki? Sambu na kuyidika mambu na yandi, Leah fwete solula ti papa na yandi; mpi sambu papa kusadisa yandi, papa fwete zaba mambu yina Leah ke kutana ti yo. Kubuya kutuba ta sadisa ve ata fioti.

Kansi, na Nsola C, Leah ke bika ve nde barrage kukanga yandi nzila ya kusolula ti papa. Kansi, yandi ke meka kutubila diambu yina na ntangu ya nkaka. Mpi kana yandi pona na kusonikila papa na yandi mukanda, Leah lenda kudiwa mbote kaka na ntangu yina.

Kusonika mukanda lenda sadisa yandi mpi na kusonika mbote-mbote mambu yina yandi ke zola kutuba. Ntangu papa ta tanga mukanda, yandi ta bakisa mambu yina Leah vandaka kusosa kusonga yandi, ebuna yo lenda sadisa yandi na kubakisa mbote mpasi ya Leah. Yo yina, Nsola C ta natila Leah mpi papa na yandi mambote. Yo vanda bo solula meso na meso to na mukanda, nsola yai ke wakana ti ndongisila ya Biblia ya kulanda “mambu yina ke kotisaka ngemba.”—Baroma 14:19.

Inki bansola ya nkaka Leah lenda vanda ti yo?

Kana nsola mosi kwisila nge na mabanza, sonika yo na nsi. Na nima sonika kisika nsola yina lenda nata nge.

 KUPUSA VE BIBUTI NA NGE NA KUBAKILA NGE BANGINDU YA MBI

Kuvila ve nde mambu ya nge tubaka mpi mambu yina bibuti na nge ke yindula nde nge tubaka, ke vandaka ve ntangu yonso kiteso mosi.

MU MBANDU:

Bibuti na nge lenda yula nge sambu na nki nge ke ve na kiese. Nge ke tuba nde, “Mu ke zola ve kutubila yo.”

Kansi bibuti na nge ke wa nde: “Mu ke tudilaka beno ve ntima yo yina mpila ya kusonga beno yo kele ve. Mu ta solula diambu yina ti banduku na mu kansi beno ve.”

Yindula nde nge ke kutana ti diambu ya mpasi ebuna bibuti na nge ke tuba nde bo lenda sadisa nge. Kansi nge tuba nde: “Beno kudiyangisa ve. Mu lenda manisa yo mu mosi.”

  • Bibuti na nge lenda wa nde nge me tuba nde

  • Mvutu ya mbote ya nge lenda pesa bo lenda vanda