Kwenda na mambu ke na kati

Kwenda na tansi ya malongi

MUTINDU BO KE SADILAKA MAKABU NA NGE

Bankunga Yina Ke Pusaka Beto Pene-Pene ti Nzambi

Bankunga Yina Ke Pusaka Beto Pene-Pene ti Nzambi

NOVEMBRI 1, 2021

 Miziki kele dikabu mosi ya kitoko ya me katukaka na Yehowa. Yo ke simbaka mabanza na beto, yo ke salaka nde beto kudiwa mbote mpi ke pesaka beto kikesa. Mambu yai kele mpi ya masonga sambu na bankunga na beto ya nkaka. Ya kieleka, bankunga lenda sala nkutu mambu mingi: yo lenda pusa beto pene-pene ya Yehowa.

 Banda 2014, beto me basisaka bankunga ya nkaka kuluta 70 mpi sesepi yai, na bandinga kuluta 500, bo me balulaka dezia kana fioti nkunga mosi na kati ya bankunga yai. Kansi nge lenda kudiyula nde: ‘Banani ke salaka bankunga yango mpi inki kisalu ke salamaka sambu na kubasisa yo?’

Mutindu Bampangi Ke Salaka Bankunga

 Bampangi-babakala mpi bankento yina ke salaka mambu ya miziki na departema ya Audio/Video bantu ke salaka bankunga yai. Departema yai ke salaka na lutwadisu ya Komite Sambu na Kulonga ya Nto-Kimvuka. Bampangi-babakala mpi bankento yina ke salaka na ekipe ya ke salaka mambu ya miziki kele bantu 13. Bo ke salaka bankunga, bo ke yidikaka miziki, bo ke yidikaka manaka mpi bo ke salaka mambu ya nkaka ya mfunu. Diaka, Komite Sambu na Kulonga me ndimaka nde bampangi ya luzolo ya mbote yina kele na ntoto ya mvimba kupesa maboko na kisalu yai, yo vanda bayina me zaba kusala bankunga mpi bayina ke yimbaka. Bampangi yai ya babakala mpi ya bankento ke sadilaka na kudikulumusa yonso mayele na bo kukonda kusosa nde bo pesa bo lukumu sambu na kisalu yina bo ke salaka.

 Inki bo ke salaka na ntwala ya kusala nkunga mosi? Kima ya ntete kele nde, Komite Sambu na Kulonga ke sosaka ntete verse yina bo ta sadila sambu na nkunga yina mpi mutindu bantu ta kudiwa ntangu bo ta landa nkunga yango. Na nima, ekipe ya bampangi ya miziki ke yidikaka miziki mpi ke sonikaka bangogo ya nkunga yango. Bo ke kotisaka ndinga sambu na mbala ya ntete. Na nima, Komite Sambu na Kulonga ke landaka nkunga yango sambu na kutala kana yo kele mbote mpi bo ke pesaka bangindu ya nkaka sambu yo kuma diaka mbote kuluta. Na nima, ekipe ya miziki ke yidikaka nkunga yango mpi bo ke kotisaka ndinga sambu na mbala ya nsuka. Kana imene, bampangi ya bisika ya mutindu na mutindu ke yimbaka nkunga yina mpi ke kotisaka ndinga. Bo ke yimbaka mpi ke kotisaka ndinga ya nkunga yango na Babetele mpi na banzo ya bantu yina kele ti bisadilu ya kukotisila ndinga.

 Sambu na kusala bankunga mpi kukotisa ndinga na yo, bampangi na beto ke sadilaka baprograme ya ordinatere ya mutindu na mutindu. Kisalu yai ke lombaka mpi nde bo sadila baapareyi ya nkaka mu mbandu, baapareyi ya bo ke budilaka miziki, apareyi yina bo ke bingaka tables de mixage, ba amplifikatere, babafle mpi bamikro. Ntalu ya mikro mosi lenda vanda 100 dolare mpi yo lenda kuma tii na 1 000 dolare. Na 2020, beto basisaka 116 000 dolare sambu na kusumba bisadilu ya kukotisila ndinga sambu na miziki.

 Inki bikesa beto ke salaka sambu na kubumba mbongo ya makabu? Na kisika nde beto vanda ti ekipe ya nene ya miziki na Betele, bampangi mingi ya luzolo ya mbote ke sadisaka beto. Katula yo, na kisika nde bampangi mingi ya ke yimbaka kukwisa kisika mosi sambu na kuyimba, mbala mingi bampangi na beto ke sadilaka programe mosi ya ordinatere yina ke basisaka ndinga ya baapareyi mingi ya miziki.

“Bankunga Yai Ke Salaka nde Lukwikilu na Mono Kuvanda Kaka Ngolo”

 Bampangi ya babakala mpi ya bankento ke zolaka kuwa bankunga yina. Mpangi-nkento Tara ke zingaka na Allemagne. Yandi ke tuba nde: “Bankunga ke sadisaka mono na kuwa mbote kana mono kele ti basusi. Kana mono ke landa yo na ndinga na mono, mono ke waka bonso nde Yehowa ke yamba mono.” Mpangi-bakala mosi na zina ya Dmitry ke zingaka na Kazakhstan. Yandi ke tuba nde: “Mono ke zolaka kulanda bankunga yina mpi mono ke kudiyangisaka ve nde yo ta pusa mono na kusala mambu ya mbi bonso bankunga yina bantu ya nsi-ntoto ke bulaka. Diaka, bankunga yai ke sadisaka mono na kulanda kutula dikebi na kinduku na mono ti Yehowa.”

 Delia ke zingaka na Afrique du Sud. Yandi ke tuba mutindu yandi ke tadilaka bankunga yai. Yandi ke tuba nde: “Sambu na mono, yo me kumaka kima mosi ya mfunu mingi sambu mono landa kuvanda ti kimpeve ya mbote. Kana mono me kuma mawa-mawa to mono ke kutana ti diambu mosi ya mpasi, mono ke zwaka kaka nkunga mosi ya ke wakanaka kibeni ti diambu ya mono ke kutana ti yo. Mbala mingi, kaka son ya mpamba ya bankunga yina lenda sadisa mono na kudiwa mbote.”

 Mpangi-nkento Lerato ke zingaka mpi na Afrique du Sud. Yandi ke tuba nde: “Nkunga ‘Yo Vandaka Pene-Pene’ mpi nkunga ‘Nsi-Ntoto ya Mpa’ ke sadisaka mono na kumona na mabanza ntangu yina mono ta yamba diaka mama na mono yina mono vandaka kuzola mingi. Konso mbala ya mono ke waka bankunga yina, mono ke monaka yandi na mabanza, yandi ke kwisa sambu na kuyamba mono.”

 Yo kele ti nkunga mosi ya me sadisaka mingi toko mosi ya nkento na Sri Lanka. Yandi ke tuba nde: “Longi na beto ya science tubaka mambu ya mbi sambu na mono na ntwala bana ya nkaka ya nzo-nkanda sambu mono kele Mbangi ya Yehowa. Mono waka boma, mpi mono zabaka ve inki mono fwete tuba. Ntangu mono vutukaka na nzo, mama lombaka mono na kulanda nkunga Étudier rend fort.’ Nkunga yango sadisaka mono na kumona nde yo lombaka nde mono sala bansosa sambu na kuyidika mvutu ya kupesa. Mbasi na yo, mono solulaka ti longi na beto. Yandi widikilaka mono mpi yandi tubaka nde, sesepi yandi me bakisa mbote mambu yina Bambangi ya Yehowa ke ndimaka. Mono ke pesa organizasio ya Yehowa mersi mutindu yo me basisilaka beto bankunga ya mutindu yai ya ke pesaka kikesa.”

 Mbongo yina yo ke lombaka sambu na kubasisa bankunga yai ke katukaka na wapi? Yo ke katukaka na makabu ya luzolo ya mbote yina bampangi ya ntoto ya mvimba ke pesaka. Bampangi mingi ke pesaka makabu yango na nzila ya bametode yina kele na donate.jw.org. Matondo mingi sambu na makabu na beno ya luzolo.