Kwenda na mambu ke na kati

Kwenda na tansi ya malongi

Minsiku ya Biblia Yina Lenda Sadisa Nge Kana Nge Kele Diaka Ve ti Kisalu

Minsiku ya Biblia Yina Lenda Sadisa Nge Kana Nge Kele Diaka Ve ti Kisalu

 Kana nge kele diaka ve ti kisalu, yo ke tendula kaka ve nde nge ta vanda ve ti mbongo mingi kansi yo lenda pusa nge mpi na kudiyangisa mpi na kuwa makasi. Beto tadila bangindu ya me landa, yina me katuka na mayele ya ke manaka ve ngala yina kele na Biblia mpi yina lenda sadisa nge.

  •   Songa bantu ya nkaka mutindu nge ke kudiwa.

     Mambu yina Biblia ke tuba: “Nduku ya kieleka ke zolaka konso ntangu.”—Bingana 17:17.

     Kana bo me katula nge na kisalu, nge lenda vanda na mawa, na makasi, nge lenda kuma kisaka-saka to nge lenda yindula nde nge kele muntu ya ke nungaka ka yandi ve. Kana nge songa bantu ya dibuta na nge mpi banduku na nge ya ngolo mutindu nge ke kudiwa, bo lenda sadisa nge na kudiwa mbote. Bo lenda pesa nge mpi bandongisila ya mbote yina lenda sadisa nge na kuzwa kisalu ya nkaka.

  •   Kudiyangisa ve kuluta ndilu.

     Mambu yina Biblia ke tuba: “Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo.”—Matayo 6:34.

     Biblia ke siamisaka beto na kuyidika mambu na ntwala. (Bingana 21:5) Kansi, yo ke longisilaka beto mpi na kudiyangisa ve kuluta ndilu sambu na bilumbu yina ke kwisa. Mbala mingi beto ke kudiyangisaka sambu na mambu yina ke salamaka ka yo ve. Yo ke mbote na kuyindula mambu ya nge fwete sala bubu yai.

     Biblia ke pesa bandongisila ya nkaka ya mbote ya ke monisa mutindu nge lenda nwana ti basusi ya nge lenda vanda ti yo sesepi. Tanga disolo “Mutindu ya Kunwana ti Basusi” sambu na kuzaba mambu mingi.

  •   Sala bansoba ya me fwana na mbongo ya nge ke sadila.

     Mambu yina Biblia ke tuba: “Mono me longukaka . . . [mutindu] ya kuzinga ti bima mingi mpi ya kuzinga kukonda bima.”—Bafilipi 4:12.

     Sala mambu na kuwakana ti luzingu na nge ya sesepi. Yo ke tendula kusoba mutindu nge ke sadilaka mbongo sambu nge sala ve badepanse ya me luta mbongo ya nge kele na yo. Vanda mayele mpi kubaka ve bamfuka kukonda mfunu.—Bingana 22:7.

     Sambu na kuzwa bangindu mingi ya ke monisa mutindu ya kusala badepanse na kuwakana ti mbongo ya nge kele na yo sesepi, tala disolo “Mutindu ya Kuzinga ti Mbongo Fioti.”

  •   Sadila ntangu na nge na mayele.

     Mambu yina Biblia ke tuba: “Beno landa kutambula na mayele . . . , beno sadila ntangu na beno mbote kibeni.”—Bakolosai 4:5.

     Ata nge kele diaka ve ti manaka ya kukwenda kisalu, vanda ti kikalulu ya kusadila ntangu na nge mbote. Yo ta sadisa nge na kutula ndonga na luzingu na nge mpi na kumona nde nge kele na mfunu.

  •   Yikana ti luzingu yai.

    Mambu yina Biblia ke tuba: “Lufutu ke vandaka na konso kisalu ya ngolo.”—Bingana 14:23.

     Vanda ya kuyilama na kusala bisalu yina me swaswana ti yina nge vandaka kusala ntete. Nge lenda ndima kusala bisalu yina ke mfunu mingi ve to yina bo ta futa nge mbongo fioti kana nge fwanisa yo ti kisalu na nge ya ntama.

  •   Kulemba ve.

     Mambu yina Biblia ke tuba: “Kuna nkeni na nge na suka mpi kubika ve nde diboko na nge kupema tii na nkokila; sambu nge me zaba ve nki ta mena.”—Longi 11:6.

     Landa kusosa kisalu. Songa bantu ya nkaka nde nge ke sosa kisalu. Solula ti bampangi na nge, bantu ya nge me zabana ti bo, banduku ya kisalu ya ntama, mpi bantu ya kartie. Tala na bakompani yina ke zwilaka bantu kisalu, na bapiblisite ya bisalu, mpi na basite internet ya bakompani sambu na kuzaba bisalu yina bo ke baka bantu. Vanda ya kuyilama na kusala ba interview mingi sambu na kisalu mpi na kutinda ba CV mingi na ntwala nde nge zwa kisalu.