Luzingu kele dikabu mosi ya mbote. Mutindu beto ke sadilaka dikabu yai konso kilumbu ke monisaka kana beto ke sepelaka ti yo to ve. Beto Bambangi ya Yehowa, beto ke salaka ngolo sambu na kusadila mayele mpi makuki na beto sambu na kukumisa mpi kupesa Yehowa nkembo, sambu yandi Muntu Ke Pesaka Luzingu. (Nk 36:9; Kus 4:11) Kansi, basusi ya konso kilumbu na ntoto yai ya mpasi lenda pusa beto na kuvutula mambu ya kimpeve na nima. (Mar 4:18, 19) Konso muntu na kati na beto fwete kudiyula nde: ‘Keti mono ke pesaka dikabu ya kuluta mbote na Yehowa? (Oze 14:2) Kisalu na mono ke nata mono na wapi? Inki kele balukanu na mono ya kimpeve? Inki mutindu mono lenda sala diaka mingi na kisalu ya kusamuna?’ Kana nge me mona mambu yina nge fwete tomisa, samba Yehowa sambu yandi sadisa nge mpi sala bansoba. Ntembe kele ve nde, kupesa Yehowa nkembo konso kilumbu ta sadisa nge na kuvanda ti luzingu ya mbote mpi ya kiese.—Nk 61:8.

BENO TALA VIDEO SADILA MAKUKI NA NGE SAMBU NA YEHOWA, MPI NA NIMA BENO PESA BAMVUTU NA BANGIUFULA YAI:

• Sambu na nki yo kele kukonda mayele kana nge ke sadila makuki na nge sambu na ntoto ya Satana? (1Yn 2:17)

• Inki balusakumunu bantu yina ke pesaka makabu ya kuluta mbote na Yehowa ke bakaka?

• Na nki kisalu ya santu nge lenda kudipesa na luzolo yonso sambu na kusadila mayele na nge?