Kwenda na mambu ke na kati

Kwenda na tansi ya malongi

 ZINGA MUTINDU BAKRISTU FWETE ZINGA

Beto Yedisa Mayele na Beto na Kisalu ya Kusamuna​—Yambula Kulonguka Biblia ti Longoki Yina Ke Yela Ve na Kimpeve

Beto Yedisa Mayele na Beto na Kisalu ya Kusamuna​—Yambula Kulonguka Biblia ti Longoki Yina Ke Yela Ve na Kimpeve

SAMBU NA NKI YO KELE MFUNU: Bantu fwete binga zina ya Yehowa sambu bo guluka. (Bar 10:13, 14) Kansi, yo ke tendula ve nde konso muntu yina ke ndima kulonguka Biblia ta zinga na kuwakana ti minsiku ya Yehowa. Beto fwete sadila ntangu na beto mbote na kisalu ya kusamuna sambu na kusadisa bantu yina ke sepela na masonga yonso kusala bansoba sambu na kusepedisa Yehowa. Kana beto me longuka ntangu ya nda ti longoki mosi ya Biblia mpi yandi ke yela ve na kimpeve, beto ta zenga kulonguka ti yandi na mayele yonso mpi beto ta sosa bantu yina ta ndima kuvanda banduku ya Yehowa mpi yina ta ndima kukota na dibundu na yandi. (Yoa 6:44) Ya kieleka, kana muntu yango me monisa nde yandi me kuma ti “nkadilu ya mbote sambu na kubaka luzingu ya mvula na mvula,” yo ta vanda mbote nde beto vutukila yandi.—Bis 13:48.

MUTINDU YA KUSALA YO:

  • Sikisa longoki ya Biblia mutindu yandi me sepela na kukuma ti nzayilu ya siki-siki.—1Tm 2:4

  • Monisa yandi mfunu ya kusadila mambu yina yandi ke longuka.—Luk 6:46-49

  • Ti mawete yonso tubila mbandu ya Yezu ya me tala muntu yina kunaka mpi na nima yula yandi nki pusaka yandi na kuvutuka nima.—Mat 13:18-23

  • Ti mayele yonso monisa yandi kikuma yina pusaka nge na kuzenga kulonguka Biblia ti yandi

  • Nge lenda songa yandi nde, bantangu ya nkaka nge ta bingaka yandi sambu na kupesa yandi kikesa mpi kana yandi monisa diaka mpusa ya kulonguka, beno ta vutukila diaka kulonguka na beno

SONGA VIDEO MPI NA NIMA BENO PESA BAMVUTU NA BANGIUFULA YAI:

  • Na disolo yai, nki me monisa nde longoki ya Biblia yelaka ve na kimpeve?

  • Inki mutindu nsamuni sadisaka longoki ya Biblia na kubakisa nde yo lombaka nde yandi sala bansoba?

  • Inki mutindu nsamuni pesaka diaka longoki ya Biblia dibaku ya kulonguka Biblia?