Yonasi 4:1-11
4 Kansi diambu yina sepedisaka ve Yonasi ata fioti, mpi yandi waka makasi ya ngolo.
2 Ebuna yandi sambaka Yehowa nde: “A, Yehowa, keti yai kele ve diambu yina vandaka kuyangisa mono ntangu mono vandaka na insi na mono? Yo yina mono mekaka kutina na Tarsisi+ na mbala ya ntete; sambu mono zabaka nde nge kele Nzambi yina ke fwilaka bantu nkenda* mpi ke wilaka bo mawa, yina ke waka makasi nswalu ve mpi yina kele ya kufuluka na zola ya kwikama,+ mpi yina ke waka mawa na kupesa mpasi.
3 Ntangu yai, O Yehowa, pardo fwa mono,* sambu yo kele mbote nde mono fwa na kisika ya kubikala na luzingu.”+
4 Yehowa yulaka yandi nde: “Keti nge kele ti kikuma ya mbote ya kuwa makasi ya ngolo mutindu yina?”
5 Ebuna Yonasi basikaka na mbanza mpi vandaka na ndambu ya esti ya mbanza. Yandi kudisadilaka sombolo kuna mpi yandi vandaka na nsi ya madidi na yo sambu na kutala mambu yina zolaka kubwila mbanza yina.+
6 Na nima, Yehowa Nzambi yidikaka mwa-nti ya bankalu sambu yo yela mpi yo fika Yonasi, na mpila nde yo pesa yandi madidi sambu na ntu na yandi mpi yo lembika mpasi na yandi. Ebuna Yonasi waka kiese mingi sambu na mwa-nti yina.
7 Kansi, Nzambi ya kieleka tindaka musobi na suka-suka na kilumbu yina landaka, mpi yo diaka mwa-nti yina ya bankalu, ebuna yo yumaka.
8 Ntangu ntangu yantikaka kusema, Nzambi tindaka mpi mupepe mosi ya tiya yina ke katukaka na ndambu ya esti, ebuna ntangu bulaka Yonasi na ntu, mpi yandi zolaka kubwa ngambu. Yandi landaka kulomba nde yandi kufwa,* mpi yandi landaka kutuba nde, “Yo kele mbote nde mono fwa na kisika ya kubikala na luzingu.”+
9 Nzambi yulaka Yonasi nde: “Keti yo kele mbote nde nge wa makasi ya ngolo sambu na mwa-nti yai ya bankalu?”+
Ebuna yandi tubaka nde: “Mono kele na kikuma ya kuwa makasi, makasi ya ngolo kibeni yo yina mono ke zola kufwa.”
10 Kansi Yehowa tubaka nde: “Nge waka mawa sambu na mwa-nti ya bankalu, yina nge salaka kima ve sambu na yo, mpi yina nge yedisaka ve; yo yelaka na mpimpa mosi mpi yo fwaka na mpimpa mosi.
11 Keti mono fwete wa mpi ve mawa sambu na Ninive mbanza ya nene,+ yina kele ti bantu kuluta 120 000, yina me zaba nkutu ve mambu ya mbote mpi ya mbi,* mpi bambisi na bo mingi?”+
Banoti na nsi ya lutiti
^ To “yina ke sadilaka bantu mambu na luzitu yonso.”
^ To “moyo na mono.”
^ To “nde moyo na yandi kufwa.”
^ To “me zaba ve luswaswanu na kati ya diboko na bo ya kitata mpi ya kimama.”
