Yobi 5:1-27

  • Kutuba ya ntete ya Elifazi ke anda (1-27)

    • ‘Nzambi ke kangaka bantu ya mayele na mayele na bo mosi ya mbi’ (13)

    • ‘Yobi fwete buya ve ndola yina Nzambi ke pesa’ (17)

5  “Binga kana nge me zola! Keti kele ti muntu sambu na kupesa nge mvutu? Na nani na kati ya basantu nge ta lomba lusadisu?   Sambu kubumba kimbeni na ntima ta fwa zoba,Mpi kulula ta fwa muntu yina kele mayele ve.   Mono me monaka zoba ke tula misisa,Kansi na mbala mosi bo singaka kisika yina yandi ke zingaka.   Bana na yandi kele ve na lutaninu,Mpi bo me bedisa bo na kielo ya mbanza,+ muntu ya kusadisa bo kele ve.   Muntu yina kele na nzala ke diaka bima yina yandi ke katula na bilanga,Yandi ke baka yo nkutu na kati ya bansende,Mpi bima na bo me kangama na mutambu.   Sambu mambu ya mbi ke katukaka ve na mfututu,Mpi mpasi ke basikaka ve na ntoto.   Sambu muntu me butukaka sambu na mpasi,Kaka mutindu tiya ke pumbukaka na zulu.   Kansi mono ta binga Nzambi,Mpi mono ta songa mambu na mono na Nzambi,   Na Muntu yina ke salaka mambu ya nene mpi yina bo lenda bakisa ve,Mpi mambu ya kuyituka yina bo lenda tanga ve. 10  Yandi ke nokisaka mvula na ntotoMpi ke tindaka masa na bilanga. 11  Yandi ke tombulaka muntu ya kukonda mfunu,Mpi yandi ke tombulaka muntu ya kele na mawa sambu na kutula yandi na kisika ya luguluku. 12  Yandi ke bebisaka balukanu ya bantu ya mayele ya mbi,Sambu kisalu ya maboko na bo kununga ve. 13  Yandi ke kangaka bantu ya mayele na mayele na bo mosi ya mbi,+Yo yina balukanu ya bantu ya mayele ke lunganaka ve. 14  Bo ke kutana ti mpimpa na kati-kati ya ntangu,Mpi bo ke tambula kisaka-saka na midi bonso nde yo vandaka mpimpa. 15  Yandi ke gulusaka bantu na mbele ya bitumba ya munoko na bo,Mpi ke gulusaka nsukami na maboko ya muntu ya ngolo, 16  Na mpila nde kivuvu kele sambu na muntu ya kukonda mfunu,Kansi munoko ya kukonda lunungu kele ya kukanga. 17  Tala! Kiese na muntu yina Nzambi ke nganina;Yo yina, kubuya ve ndola yina Nkwa-Ngolo Yonso ke pesa! 18  Sambu yandi ke pesaka mpasi, kansi yandi ke kangaka bande na mputa;Yandi ke bukaka, kansi yandi ke belulaka ti maboko na yandi mosi. 19  Yandi ta gulusa nge na bampasi sambanu,Ata ya nsambwadi ta sala nge mbi ve. 20  Na ntangu ya nzala, yandi ta gulusa nge na lufwa,Mpi yandi ta gulusa nge na ngolo ya mbele ya bitumba na ntangu ya bitumba. 21  Bo ta tanina nge na ludimi yina ke tubaka mambu ya mbi,+Mpi nge ta wa ve boma ya kubeba ntangu yo ta kwisa. 22  Nge ta seka lufwa mpi nzala,Mpi nge ta wa ve boma ya bambisi ya mfinda ya nsi-ntoto. 23  Sambu matadi ya bilanga ta sala nge mbi ve,*Mpi bambisi ya mfinda ta zinga na ngemba ti nge. 24  Nge ta zaba nde tenta na nge kele na lutaninu,*Mpi ata kima mosi ve ta konda ntangu nge ta tala nseke na nge. 25  Nge ta vanda ti bana mingi,Mpi bana na nge ta vanda mingi kibeni bonso matiti ya ntoto. 26  Nge ta vanda kaka ngolo ntangu nge ta kwenda na maziamu,Bonso bisuka ya ble yina bo me vukisa na nsungi na yo. 27  Tala! Beto me tadila mambu yai, mpi yo kele mutindu yina.Wa mpi ndima yo.”

Banoti na nsi ya lutiti

To “ta sala kuwakana ti nge.”
Na kisina, “ngemba.”