Yobi 39:1-30

  • Bambisi ke monisaka nde muntu me zaba kima ve (1-30)

    • Bankombo ya ngumba mpi bakabuluku (1-4)

    • Mpunda ya mfinda (5-8)

    • Mpakasa (9-12)

    • Otrishi (13-18)

    • Mpunda (19-25)

    • Kumbi-kumbi mpi ngo-zulu (26-30)

39  “Keti nge me zaba ntangu bankombo ya ngumba ke butaka?+ Keti nge me talaka mutindu bakabuluku ke butaka bana na bo?+   Keti nge ke tangaka bangonda yina bo ke vandaka ti bana na divumu? Keti nge me zaba ntangu yina bo ke butaka?   Bo ke niekaka ntangu bo ke butaka bana na bo,Ebuna misongo na bo ke manaka.   Bana na bo ke kumaka ngolo mpi ke yelaka na nseke;Bo ke kwendaka mpi ke vutukilaka bo ve.   Nani bikisaka mpunda ya mfinda* yo kwenda,+Mpi nani kangulaka bansinga ya mpunda ya mfinda?   Mono me kumisaka ntoto ya zelo na zelo nzo na yoMpi insi ya mungwa kisika na yo ya kuzinga.   Yo ke vwezaka mavwanga ya mbanza;Yo ke waka ve makelele ya muntu yina ke sadisaka yo kisalu.   Yo ke tambula-tambulaka na bangumba ya fioti, sambu na kusosa matiti,Mpi sambu na kusosa tu-banti yonso ya mubisu.   Keti mpakasa ta zola kusadila nge?+ Keti yo ta lala na nzo na nge ya kubumba bampunda?* 10  Keti nge ta kanga mpakasa nsinga sambu yo bundula mikala na nge,To keti yo ta landa nge sambu na kubundula* muwanda? 11  Keti nge ta tula ntima na ngolo na yo ya mingiMpi kubikila yo kisalu na nge ya ngolo? 12  Keti nge ta tudila yo ntima sambu yo natila nge bima na nge ya nge ta katula na bilanga,*Mpi keti yo ta vukisa bima yina na kisika na nge ya bo ke tutaka bambuma sambu na kukatula yo bampusu? 13  Mapapu ya otrishi ya nkento ke bula-bulaka na kiese yonso,Kansi keti bo lenda fwanisa mapapu na yandi mpi mansala na yandi ti ya mubila?+ 14  Sambu yandi ke yambulaka maki na yandi na ntoto,Mpi yandi ke bikaka yo na mfututu sambu yo baka tiya. 15  Yandi ke vilaka nde dikulu mosi lenda niata yoTo nde mbisi mosi ya mfinda lenda niata yo. 16  Yandi ke sadilaka bana na yandi mambu na nku yonso, bonso nde bo kele ve bana na yandi;+Yandi ke waka ve boma nde kisalu na yandi ya ngolo lenda vanda ya mpamba. 17  Sambu Nzambi me buyaka kupesa yandi* mayele,Mpi me pesaka yandi ve dikabu ya mayele ya kubakisa mambu. 18  Kansi ntangu yandi ke telamaka mpi ke bulaka mapapu na yandi,Yandi ke sekaka mpunda ti muntu yina ke tambusaka yo. 19  Keti nge muntu ke pesaka mpunda ngolo na yo?+ Keti nge ke lwatisaka nkingu na yo mika ya nda yina ke nikanaka? 20  Keti nge lenda sala nde yo pumbuka bonso mpasu? Kana yo sala nsia, yo ke pesaka boma.+ 21  Yo ke bula-bulaka makulu na ntoto na kati ya muwanda mpi ke vandaka na kiese ya ngolo;+Yo ke kwendaka ntinu na bitumba.*+ 22  Yo ke sekaka boma mpi ke waka ve boma ata ya kima mosi.+ Yo ke vutukaka ve nima sambu na mbele ya bitumba. 23  Lupaya ke salaka makelele ntangu yo ke tutanaka ti yo,Dikonga ya nene mpi ya fioti ke basisaka nsemo. 24  Ntangu yo ke tekitaka na kiese, yo ke kwendaka na ntwala,*Yo lenda telama ve kana yo wa* makelele ya kibongo. 25  Ntangu kibongo ke bulaka, yo ke tubaka nde, ‘Aa!’ Yo ke waka nsudi ya bitumba na kintamaMpi ke waka milolo ya bamfumu mpi milolo ya bitumba.+ 26  Keti kumbi-kumbi ya matono-matono ke pumbukaka na mayele na nge ya kubakisa mambu,Mpi ke tandulaka mapapu na yo na ndambu ya sudi? 27  To keti ngo-zulu ke landaka nsiku na nge yo yina yo ke pumbukaka+Yo ke tungaka buyamba na yo na zulu,+ 28  Yo ke lalaka na nsongi ya ditadi,Mpi ke zingaka na kisika na yo ya ngolo ya lutaninu na zulu ya ditadi?* 29  Katuka kuna yo ke sosaka madia;+Meso na yo ke talaka ntama kibeni. 30  Bana na yo ke nwaka menga;Mpi konso kisika yina bamvumbi kele, yo ke vandaka pana.”+

Banoti na nsi ya lutiti

To “onagre.”
To “na kidikilu na nge.”
To “kuyidika.”
Na kisina, “nkeni na nge.”
Na kisina, “me salaka nde yandi vila.”
Na kisina, “Yo ke basikaka sambu na kukutana ti binwaninu.”
Na kisina, “ke minaka ntoto.”
To mbala ya nkaka, “Yo ke ndimaka ve.”
Na kisina, “na zulu ya dinu ya ditadi.”