Yobi 19:1-29

  • Mvutu ya Yobi (1-29)

    • Yandi me ndima ve kunganina yina “banduku” na yandi me nganina yandi (1-6)

    • Yandi me tuba nde bo me yambula yandi (13-19)

    • “Muntu yina ke sumbulula mono kele na luzingu” (25)

19  Yobi vutulaka nde:   “Tii nki ntangu beno ta landa kuyangisa moyo na mono,*+Kututa mono ti bangogo?+   Yai mbala ya kumi ya beno ke nganina* mono;Beno ke wa nsoni ve na kusadila mono mambu na nku yonso.+   Kana ya kieleka mono salaka kifu,Kifu na mono ke tadila kaka mono.   Kana beno ke kwamina na kudinangula na zulu na mono,Mpi ke tuba nde nsoni me bwila mono ti kikuma,   Beno zaba nde Nzambi muntu me kusa mono,Mpi yandi me kanga mono na bukondi na yandi ya kuzomba.   Tala! Mono ke landa kuboka na ndinga ya ngolo nde, ‘Nku!’ kansi mono ke baka mvutu ve;+Mono ke landa kuboka sambu na kulomba lusadisu, kansi lunungu kele ve.+   Yandi me kanga nzila na mono ti kibaka ya matadi, mpi mono lenda luta ve;Yandi me fika banzila na mono ti mpimpa.+   Yandi me katula mono nkembo na monoMpi me katula mpu ya kimfumu na ntu na mono. 10  Yandi ke buka-buka mono na bandambu yonso tii kuna mono ta fwa;Yandi ke tumuna kivuvu na mono bonso nti. 11  Yandi ke wila mono makasi ya ngolo,Mpi yandi ke mona mono bonso mbeni na yandi.+ 12  Basoda na yandi me kwisa kumosi mpi me ziunga mono,Mpi bo me sala camp na nziunga ya tenta na mono. 13  Bampangi na mono mosi, yandi me kula bo ntama ti mono,Mpi bantu yina me zaba mono me pesa mono mukongo.+ 14  Banduku na mono ya ngolo* me kwenda,Mpi bantu yina mono zabaka mbote me vila mono.+ 15  Banzenza yina kele na nzo na mono+ ti bampika na mono ya bankento ke baka mono bonso munzenza;Mono kele munzenza na meso na bo. 16  Mono ke binga nsadi na mono, kansi yandi ke ndima ve;Mono ke bondila yandi na munoko na mono sambu yandi wila mono mawa. 17  Mpema na mono me kuma kima ya nzanzi sambu na nkento na mono,+Mpi mono kele kima ya nsudi ya mbi sambu na bampangi na mono mosi.* 18  Ata bana ya fioti ke vweza mono;Kana mono telama, bo ke yantika kuseka mono. 19  Banduku na mono yonso ya ngolo ke menga mono,+Mpi bantu yina mono vandaka kuzola me balukila mono.+ 20  Mikwa na mono ke kangama na mpusu na mono ti na nsuni na mono,+Mpi mono ke guluka ti mpusu ya meno na mono. 21  Beno wila mono mawa, banduku na mono, beno wila mono mawa,Sambu diboko ya Nzambi me simba mono.+ 22  Sambu na nki beno ke landa kumonisa mono mpasi mutindu Nzambi ke monisa mono mpasi,+Mpi beno ke nwanisa mono kukonda kulemba?*+ 23  A kana bo sonikaka bangogo na mono!A kana bo sonikaka yo na mukanda mosi! 24  A kana bo sonikaka yo kimakulu na ditadi,Ti kilapi ya kibende mpi plomb! 25  Sambu mono ke zaba mbote nde muntu yina ke sumbulula mono*+ kele na luzingu;Yandi ta kwisa na nima mpi ta telama na zulu ya ntoto.* 26  Kana maladi kubebisa mpusu na mono mutindu yina imene,Na ntangu ya mono kele kaka na nsuni na mono, mono ta mona Nzambi, 27  Yina mono ta mona na meso na mono mosi,Yina meso na mono mosi ta mona, kansi ya muntu ya nkaka ve.+ Kansi mono ke mona nde mambu me lutila mono na kati kibeni!* 28  Sambu beno ke tuba nde, ‘Na nki mutindu beto ke monisa yandi mpasi?’+ Sambu mono muntu kele na kisina ya makambu. 29  Beno vanda beno mosi na boma ya mbele ya bitumba,+Sambu mbele ya bitumba ke nataka ndola na bantu ya ke salaka bifu;Beno fwete zaba nde zuzi kele.”+

Banoti na nsi ya lutiti

To “kuyangisa mono.” Tala Bantendula ya Bangogo.
To “finga.”
To “Bampangi na mono.”
Na kisina, “bana ya divumu na mono,” disongidila, divumu yina butaka mono (divumu ya mama na mono).
Na kisina, “Mpi beno ke fuluka ve nsuni na mono?”
To “muntu yina ke sumba mono diaka.”
Na kisina, “na zulu ya mfututu.”
To “Bapiku na mono me lemba na kati na mono.”