Yoane 18:1-40

  • Yudasi me teka Yezu (1-9)

  • Piere me sadila mbele ya bitumba (10, 11)

  • Bo me nata Yezu na Ana (12-14)

  • Piere me buya sambu na mbala ya ntete nde yandi me zaba ve Yezu (15-18)

  • Yezu na ntwala ya Ana (19-24)

  • Piere me buya Yezu sambu na mbala ya zole mpi ya tatu nde yandi me zaba ve Yezu (25-27)

  • Yezu na ntwala ya Pilate (28-40)

    • “Kimfumu na mono kele ve ya nsi-ntoto yai” (36)

18  Ntangu Yezu tubaka mambu yai, yandi ti balongoki na yandi kwendaka na simu ya Muwanda ya Kidroni,+ kisika kilanga mosi vandaka, ebuna yandi ti balongoki na yandi kotaka kuna.+  Kansi Yudasi, muntu yina tekaka yandi, zabaka mpi kisika yina, sambu mbala mingi Yezu vandaka kukutana ti balongoki na yandi kuna.  Yo yina, Yudasi bakaka kimvuka mosi ya basoda, mpi bapolisi ya bamfumu ya banganga-nzambi ti ya Bafarize, ebuna bo kwisaka kuna ti banti ya ke pela, minda, mpi binwaninu.+  Sambu Yezu zabaka mambu yonso yina zolaka kukumina yandi, yandi kwendaka na ntwala mpi tubilaka bo nde: “Beno ke sosa nani?”  Bo vutudilaka yandi nde: “Yezu muntu ya Nazareti.”+ Yandi tubilaka bo nde: “Mono yandi yai.” Yudasi muntu yina tekaka yandi, vandaka mpi ti bo.+  Kansi, ntangu yandi tubilaka bo nde, “Mono yandi yai,” bo vutukaka kinima-nima mpi bo bwaka na ntoto.+  Yandi yulaka bo diaka nde: “Beno ke sosa nani?” Bo tubaka nde: “Yezu muntu ya Nazareti.”  Yezu vutulaka nde: “Mono me tubila beno nde mono yandi yai. Yo yina, kana beno ke sosa mono, beno bikisa bantu yai bo kwenda.”  Yandi salaka yo sambu na kulungisa mambu yina yandi tubaka nde: “Na bantu yina nge me pesaka mono, mono vidisaka ve ata mosi.”+ 10  Simoni Piere vandaka ti mbele ya bitumba, yandi basisaka yo, yandi bulaka mpika ya nganga-nzambi ya nene mpi yandi zengaka yandi dikutu ya kitata.+ Zina ya mpika yina Malkusi. 11  Kansi Yezu tubilaka Piere nde: “Tula mbele ya bitumba na poshi na yo.+ Keti mono fwete nwa ve dikopa yina Tata me pesa mono?”+ 12  Ebuna basoda, komanda ya basoda, mpi bapolisi ya Bayuda kangaka Yezu mpi bo kangisaka yandi bansinga. 13  Bo nataka yandi ntete na Ana, sambu yandi vandaka bokilo ya Kaifa,+ yina vandaka nganga-nzambi ya nene na mvula yina.+ 14  Ya kieleka, Kaifa muntu longisilaka Bayuda nde yo vandaka sambu na mambote na bo nde muntu mosi kufwa sambu na bantu yonso.+ 15  Simoni Piere ti longoki ya nkaka vandaka kulanda Yezu.+ Longoki yina zabanaka ti nganga-nzambi ya nene, mpi yandi kotaka ti Yezu na kibansala ya nganga-nzambi ya nene, 16  kansi Piere vandaka ya kutelama na nganda pene-pene ya kielo.* Yo yina longoki yina ya nkaka, yina zabanaka ti nganga-nzambi ya nene, basikaka mpi solulaka ti muntu yina vandaka kukengila kielo ebuna yandi kotisaka Piere. 17  Nsadi ya nkento yina vandaka kukengila kielo tubilaka Piere nde: “Keti nge mpi, nge kele ve longoki ya muntu yai?” Yandi tubaka nde: “Ve, mono ve.”+ 18  Bampika ti bapolisi vandaka ya kutelama pene-pene ya tiya yina bo tulaka, sambu madidi vandaka mingi, mpi bo vandaka kuyotila tiya. Piere mpi vandaka ya kutelama ti bo mpi yandi vandaka kuyotila tiya. 19  Mfumu ya banganga-nzambi yulaka Yezu mambu ya me tala balongoki na yandi mpi mambu ya me tala malongi na yandi. 20  Yezu vutudilaka yandi nde: “Mono vandaka kutuba na nsi-ntoto na meso ya bantu yonso. Mono vandaka kulonga ntangu yonso na sinagoga mpi na tempelo,+ kisika Bayuda yonso ke vukanaka, mpi mono tubaka ata kima mosi ve na kinsweki. 21  Sambu na nki nge ke yula mono? Yula bantu yina waka mambu yina mono tubilaka bo. Bo me zaba mambu yina mono tubaka.” 22  Ntangu Yezu manisaka kutuba mambu yai, polisi mosi yina vandaka ya kutelama pana bulaka yandi mbata na luse+ mpi tubaka nde: “Keti yina mutindu nge ke pesa mfumu ya banganga-nzambi mvutu?” 23  Yezu vutudilaka yandi nde: “Kana mono me tuba diambu mosi ya mbi, ta kimbangi sambu na* diambu yina ya mbi; kansi kana diambu ya mono me tuba kele ya mbote, sambu na nki nge me bula mono?” 24  Ebuna Ana tindaka yandi na Kaifa, nganga-nzambi ya nene. Yandi vandaka kaka ya kukanga bansinga.+ 25  Simoni Piere vandaka ya kutelama mpi yandi vandaka kuyotila tiya. Ebuna bo tubilaka yandi nde: “Keti nge mpi, nge kele ve longoki na yandi?” Yandi buyaka nde: “Ve, mono ve.”+ 26  Mpika mosi ya nganga-nzambi ya nene, yina vandaka mpangi ya muntu yina Piere zengaka dikutu,+ tubaka nde: “Mono monaka nge na kilanga ti yandi, mpidina ve?” 27  Kansi, Piere buyaka diaka, mpi na mbala mosi nsusu kokulaka.+ 28  Ebuna na suka-suka, bo katulaka Yezu na Kaifa mpi bo nataka yandi na nzo ya guvernere.+ Kansi bo mosi bo kotaka ve na nzo ya guvernere, sambu bo kudikumisa ve mvindu+ mpi bo kuka kudia Paki. 29  Yo yina Pilate basikaka na nganda na ntwala na bo mpi yandi tubaka nde: “Sambu na nki diambu beno ke funda muntu yai?” 30  Bo vutudilaka yandi nde: “Kana muntu yai vandaka ve muntu ya mbi, beto zolaka ve kupesa yandi na maboko na nge.” 31  Pilate tubilaka bo nde: “Beno baka yandi beno mosi mpi beno sambisa yandi na kulanda nsiku na beno.”+ Bayuda tubilaka yandi nde: “Nsiku ke pesa beto ve nswa ya kufwa muntu.”+ 32  Yo salamaka mutindu yina sambu na kulungisa mambu yina Yezu tubaka sambu na kumonisa mutindu ya lufwa yina yandi zolaka kufwa.+ 33  Pilate kotaka diaka na nzo ya guvernere, yandi bingaka Yezu, mpi yandi tubilaka yandi nde: “Keti nge kele Ntotila ya Bayuda?”+ 34  Yezu vutulaka nde: “Keti nge ke yula yo na mabanza na nge mosi, to keti bantu ya nkaka tubilaka nge mambu na mono?” 35  Pilate vutulaka nde: “Mono kele ve Muyuda, mpidina ve? Dikanda na nge mosi mpi bamfumu ya banganga-nzambi pesaka nge na maboko na mono. Nge salaka inki?” 36  Yezu vutulaka nde:+ “Kimfumu na mono kele ve ya nsi-ntoto yai.+ Kana Kimfumu na mono vandaka ya nsi-ntoto yai, bansadi na mono zolaka kunwana sambu bo pesa mono ve na maboko ya Bayuda.+ Kansi, Kimfumu na mono kele ve ya nsi-ntoto yai.” 37  Ebuna Pilate tubilaka yandi nde: “Disongidila, nge kele ntotila?” Yezu vutulaka nde: “Nge mosi muntu me tuba nde mono kele ntotila.+ Mono butukaka sambu na diambu yai, mpi mono kwisaka na nsi-ntoto sambu na diambu yai, nde mono ta kimbangi sambu na kieleka.+ Konso muntu yina kele na lweka ya kieleka ke waka ndinga na mono.” 38  Pilate tubilaka yandi nde: “Kieleka kele inki?” Ntangu yandi manisaka kutuba mambu yai, yandi kwendaka diaka na Bayuda mpi yandi tubilaka bo nde: “Mono me mona ve ata diambu mosi ya mbi na yandi.+ 39  Diaka, beno ke vandaka ti kikalulu nde mono basisila beno muntu mosi na Paki.+ Yo yina, keti beno ke zola nde mono basisila beno Ntotila ya Bayuda?” 40  Bo tubaka diaka na ndinga ya ngolo nde: “Yandi ve, kansi Barabasi!” Barabasi yina vandaka muyibi.+

Banoti na nsi ya lutiti

To “na kisika ya kukotila.”
To “monisa.”