Yezaya 40:1-31
40 Nzambi na beno ke tuba nde: “Beno lembika, beno lembika bantu na mono.+
2 Beno tuba na ntima ya Yeruzalemi,*Mpi beno zabisa yandi nde kisalu na yandi ya kingolo-ngolo me mana,Nde bo me futa kifu na yandi.+
Yandi me baka ndola kibeni* na diboko ya Yehowa sambu na masumu na yandi yonso.”+
3 Ndinga ya muntu mosi ke tuba na ndinga ya ngolo na ntoto-makanga nde:
“Beno yidika nzila ya Yehowa!+
Beno sala nzila mosi ya nene ya kusungama+ na ntoto ya zelo na zelo sambu na Nzambi na beto.+
4 Bika nde konso muwanda kutombuka,Mpi konso ngumba ya nene ti ya fioti kukulumuka.
Ntoto ya kele ti bangumba fwete kuma lelensi,Mpi ntoto ya kele mabulu-mabulu fwete kuma kukonda ngumba.+
5 Nkembo ya Yehowa ta monana,+Mpi bantu yonso* ta mona yo,+Sambu munoko ya Yehowa muntu me tuba.”
6 Wa! Muntu mosi ke tuba nde: “Tuba na ndinga ya ngolo!”
Ya nkaka ke yula nde: “Nki mono fwete tuba na ndinga ya ngolo?”
“Bantu* yonso kele matiti ya mubisu.
Zola na bo yonso ya kwikama kele bonso bintuntu ya bilanga.+
7 Matiti ya mubisu ke yuma,Bintuntu ke kawuka,+Sambu mpema* ya Yehowa ke bula na zulu na yo.+
Ya kieleka, bantu kele kaka matiti ya mubisu.
8 Matiti ya mubisu ke yumaka,Bintuntu ke kawukaka,Kansi ndinga ya Nzambi na beto ke zingaka kimakulu.”+
9 Tombuka na ngumba ya nda,Nge nkento ya ke nata nsangu ya mbote sambu na Sioni.+
Tombula ndinga na nge na ngolo yonso,Nge nkento ya ke nata nsangu ya mbote sambu na Yeruzalemi.
Tombula yo, kuwa boma ve.
Zabisa bambanza ya Yuda nde: “Nzambi na beno yandi yai.”+
10 Tala! Yehowa Mfumu ya Kuluta Nene ta kwisa ti ngolo,Mpi diboko na yandi ta yala sambu na yandi.+
Tala! Matabisi na yandi kele ti yandi,Mpi lufutu yina yandi ke pesa kele na ntwala na yandi.+
11 Bonso ngungudi, yandi ta keba* mameme na yandi.+
Ti diboko na yandi, yandi ta vukisa bana-mameme,Mpi yandi ta nata bo na ntulu na yandi.
Yandi ta twadisa na mawete yonso bayina ke nwisa bana na bo.+
12 Nani me tesaka bamasa na diboko na yandi+Mpi me tesaka zulu ti kitamina ya misapi ya diboko na yandi?*
Nani me tulaka mfututu ya ntoto+ na kitesiluTo me tesaka bangumba ya nene na bima ya kutesilaMpi bangumba ya fioti na bakilo?
13 Nani me tesaka* mpeve ya Yehowa,Mpi nani lenda longa yandi bonso ndongisi na yandi?+
14 Yandi pesanaka mabanza ti nani sambu na kubaka mayele ya kubakisa mambu,To nani ke longaka yandi na nzila ya lunungu,To ke longaka yandi nzayilu,To ke songaka yandi nzila ya mayele ya kieleka ya kubakisa mambu?+
15 Tala! Makanda kele bonso ditonsi ya masa na kantini,Mpi bo ke monaka bo bonso mwa mfututu na zulu ya bakilo.+
Tala! Yandi ke nangula bisanga bonso mfututu.
16 Libani nkutu me fwana ve na kusala nde tiya kulanda kupela,*Mpi bambisi na yo ya mfinda me fwana ve sambu na dikabu ya kuyoka.
17 Na meso na yandi makanda yonso kele bonso kima mosi ya ke vandaka ve na luzingu;+Yandi ke monaka bo bonso kima ya mpamba, bonso ata kima mosi ve.+
18 Beno lenda fwanisa Nzambi ti nani?+
Inki me fwanana ti yandi ya beno lenda tula pene-pene na yandi?+
19 Muntu yina ke salaka bisalu ya maboko me sala kiteki,*Muntu ya ke salaka bima ya bibende me pakula yo wolo,+Mpi yandi ke sala bashene ya arza.
20 Yandi ke sola nti sambu yandi pesa yo dikabu,+Nti yina ta pola ve.
Yandi ke sosa muntu yina me zaba kisalu ya maboko mboteSambu yandi sala kiteki yina lenda nikana ve.+
21 Keti beno me zaba ve?
Keti beno me wa ve?
Keti bo songaka beno yo ve katuka luyantiku?
Keti beno bakisaka ve tuka bo salaka bafondasio ya ntoto?+
22 Kele ti Muntu yina ke zinga- ka na zulu ya nkongolo ya ntoto,+Mpi bantu yina ke zingaka na kati kele bonso bampasu.
Yandi ke tandula zulu bonso lele ya pete-pete,Mpi yandi ke tandula yo bonso tenta sambu na kuzinga kuna.+
23 Yandi ke kulumusa bamfumu ya neneMpi ke kumisa bazuzi* ya ntoto kima mosi ya ke vandaka ve.
24 Bo ke kunaka yo na mpasi,Bo ke mwangaka yo na mpasi,Nti na yo ke tulaka misisa na ntoto na mpasi,Mupepe ke bulaka yo mpi yo ke yumaka,Mpi mupepe ke nataka yo ntama bonso nianga.+
25 “Ti nani beno lenda fwanisa mono sambu na kukumisa mono kiteso mosi ti yandi?” Santu muntu ke tuba.
26 “Beno tombula meso na beno na zulu mpi beno mona.
Nani me salaka bima yai?+
Yo kele Muntu yina ke basisaka makesa na yo na kutadila ntalu na yo;Yandi ke bingaka yo yonso na zina na yo.+
Sambu na ngolo na yandi ya mingi kibeni mpi na ngolo na yandi ya ke pesaka boma,+Ata mosi ve na kati na yo me konda.
27 O Yakobi, sambu na nki nge ke tuba, O Izraele, sambu na nki nge ke tuba, nde:‘Nzila na mono kele ya kubumbana na meso ya Yehowa,Mpi Nzambi ke sambisa ve mambu na mono na lunungu’?+
28 Keti nge me zaba ve? Keti nge me waka ve?
Yehowa, Ngangi ya nsuka ya ntoto, kele Nzambi mvula na mvula.+
Yandi ke lembaka ve ata fioti mpi ngolo na yandi ke manaka ve.+
Bo lenda bakisa ve mayele na yandi ya kubakisa mambu.+
29 Yandi ke pesaka ngolo na muntu yina me lembaMpi ngolo ya mingi na bantu yina me konda kikesa.+
30 Bana-babakala ta lemba mpi ngolo na bo ta mana,Mpi baleke ya babakala ta bula sakuba mpi ta bwa,
31 Kansi bantu yina ke tulaka kivuvu na Yehowa ta baka diaka ngolo.
Bo ta pumbuka na mapapu bonso bango-zulu.+
Bo ta baka ntinu mpi ngolo na bo ta mana ve;Bo ta tambula mpi ta lemba ve.”+
Banoti na nsi ya lutiti
^ To “Beno tuba na Yeruzalemi na mutindu ya ke lembika ntima.”
^ To “me baka mbala zole.”
^ Na kisina, “nsuni yonso.”
^ Na kisina, “Nsuni.”
^ To “mpeve.”
^ To “ta gungula.”
^ Kitamina yina kele na kati ya nsuka ya musapi ya nene ti nsuka ya musapi ya fioti kana diboko kele ya kutandula. Tala Bangindu ya Ngika B14.
^ To mbala ya nkaka, “me bakisaka.”
^ To “lenda pesa ve bankuni ya me fwana.”
^ To “kiteki ya kibende ya bo me lamba na tiya.”
^ To “bamfumu.”
