Yezaya 37:1-38

  • Ezekiasi me sosa lusadisu ya Nzambi na nzila ya Yezaya (1-7)

  • Senakeribi me pesa Yeruzalemi boma (8-13)

  • Kisambu ya Ezekiasi (14-20)

  • Yezaya me pesa mvutu ya Nzambi (21-35)

  • Wanzio mosi me fwa bantu ya Asiria 185 000 (36-38)

37  Ntangu ntotila Ezekiasi waka mambu yai, yandi pasulaka bilele na yandi, kudifikaka saki, mpi kotaka na nzo ya Yehowa.+  Na nima yandi tindaka Eliakimi, yina vandaka mfumu ya nzo,* sekretere Shebna, mpi bankuluntu ya banganga-nzambi, bayina kudifikaka basaki, sambu na kukwenda na mbikudi Yezaya+ mwana ya Amozi.  Bo tubilaka yandi nde: “Ezekiasi me tuba nde, ‘Bubu kele kilumbu ya mpasi, ya kunganina,* mpi ya nsoni; sambu bana ke zola kubutuka,* kansi ngolo ya kubuta+ kele ve.  Mbala ya nkaka Yehowa Nzambi na nge ta wa mambu yina Rabshake me tuba, yina ntotila ya Asiria mfumu na yandi tindaka sambu na kusosila Nzambi ya moyo,+ mpi yandi ta sambisa yandi sambu na mambu yina Yehowa Nzambi na nge me wa. Yo yina, samba+ sambu na bantu ya me bikala yina me guluka.’”+  Yo yina bansadi ya ntotila Ezekiasi kotaka kisika Yezaya+ vandaka,  ebuna Yezaya tubilaka bo nde: “Beno fwete tubila mfumu na beno nde, ‘Yehowa me tuba nde: “Kuwa boma ve+ sambu na mambu yina nge me wa, mambu yina bansadi ya ntotila ya Asiria+ me tuba sambu na kuvweza mono.  Mono ke tula ngindu mosi na mabanza na yandi,* ebuna yandi ta wa nsangu mosi mpi ta vutuka na insi na yandi;+ mpi mono ta sala nde yandi fwa na mbele ya bitumba na insi na yandi mosi.”’”+  Ntangu Rabshake waka nde ntotila ya Asiria me katuka na Lakishi, yandi vutukaka na ntotila mpi kutaka yandi, yandi ke nwanisa Libna.+  Ebuna ntotila waka bo ke tuba sambu na ntotila Tiraka ya Etiopia nde: “Yandi me kwisa kunwanisa nge.” Ntangu yandi waka mambu yai, yandi tindilaka diaka Ezekiasi+ binati-nsangu, mpi tubaka nde: 10  “Beno fwete tubila Ezekiasi ntotila ya Yuda nde, ‘Kubika ve nde Nzambi na nge yina nge ke tudila ntima kukusa nge nde: “Bo ta pesa ve Yeruzalemi na maboko ya ntotila ya Asiria.”+ 11  Nge waka mambu yina bantotila ya Asiria salaka na bansi yonso na mutindu bo fwaka yo.+ Keti nge mpamba muntu ta guluka? 12  Keti banzambi ya makanda yina ba-nkaka na mono fwaka gulusaka bo?+ Wapi Gozani, Arani,+ Resefi, mpi bantu ya Edeni yina vandaka na Tele-asare? 13  Wapi ntotila ya Amati, ntotila ya Arpadi, mpi ntotila ya bambanza ya Sefarvayimi,+ ya Ena, mpi ya Iva?’” 14  Ezekiasi bakaka mikanda na maboko ya binati-nsangu mpi tangaka yo. Ebuna Ezekiasi tombukaka na nzo ya Yehowa mpi yandi tandaka yo na ntwala ya Yehowa.+ 15  Mpi Ezekiasi yantikaka kusamba Yehowa+ mpi kutuba nde: 16  “O Yehowa ya makesa,+ Nzambi ya Izraele, yina me vanda na kiti ya kimfumu na zulu* ya basherube, nge mpamba kele Nzambi ya kieleka ya bimfumu yonso ya ntoto. Nge salaka zulu ti ntoto. 17  O Yehowa, tula dikutu mpi wa!+ O Yehowa, kangula meso mpi tala!+ Wa mambu yonso yina Senakeribi me tinda bantu na kutuba sambu na kusosila Nzambi ya moyo.+ 18  O Yehowa, yo kele ya kieleka nde bantotila ya Asiria me fwaka bansi yonso+ ti insi na bo mosi. 19  Mpi bo me losaka banzambi na bo na tiya,+ sambu bo vandaka ve banzambi kansi kisalu ya maboko ya bantu,+ nti mpi ditadi. Yo yina bo kukaka kufwa bo. 20  Kansi ntangu yai, O Yehowa Nzambi na beto, gulusa beto na maboko na yandi, sambu bimfumu yonso ya ntoto kuzaba nde nge mpamba kele Nzambi, O Yehowa.”+ 21  Ebuna Yezaya mwana ya Amozi tindilaka Ezekiasi nsangu yai: “Yehowa Nzambi ya Izraele me tuba nde, ‘Sambu nge me samba mono sambu na Senakeribi ntotila ya Asiria,+ 22  Yehowa me tuba sambu na yandi nde: “Mwana-nkento ya mwense ya Sioni ke vweza nge, yandi ke seka nge. Mwana-nkento ya Yeruzalemi ke nikisila nge ntu na yandi. 23  Nani nge me sosila+ mpi me vweza? Nani nge me tombudila ndinga na nge+Mpi me nangudila meso na nge ya lulendo? Santu ya Izraele!+ 24  Na nzila ya bansadi na nge, nge me sosila Yehowa+ mpi nge me tuba nde,‘Ti bapusu-pusu na mono mingi ya bitumbaMono ta tombuka na zulu ya bangumba,+Bisika ya kuluta ntama ya Libani. Mono ta zenga banti na yo ya sedre ya nda, banti na yo ya yenevriye ya kuluta kitoko. Mono ta kota na bisika na yo ya kingenga ya kele na zulu kibeni, bamfinda na yo ya kufuluka na banti. 25  Mono ta timuna mabulu ya masa mpi ta nwa bamasa;Mono ta yumisa bamasa* ya Ezipte ti bitambi ya makulu na mono.’ 26  Keti nge waka ve? Mono kanaka* yo tuka ntama. Mono yidikaka* yo+ katuka bilumbu ya ntama kibeni. Ntangu yai mono ta lungisa yo.+ Nge ta kumisa bambanza ya ngolo mayumbu.+ 27  Bantu na bo ta konda lusadisu;Bo ta wa boma ya ngolo mpi bo ta pesa bo nsoni. Bo ta kuma bonso matiti ya bilanga mpi matiti ya mubisu,Bonso matiti ya baludi yina mupepe ya esti me yumisa. 28  Kansi mono me zaba mbote ntangu nge ke vandaka, ntangu nge ke basikaka, ntangu nge ke kotaka,+Mpi ntangu nge ke wilaka mono makasi ya ngolo,+ 29  Sambu makasi ya nge me wila mono+ mpi kungana na nge me kuma na makutu na mono.+ Yo yina mono ta tula ndobo na mono na mbombo na nge mpi nsinga na mono+ ya bo ke tulaka na munoko ya mpunda na munoko na nge,Ebuna mono ta vutula nge na nzila yina nge kwisilaka.” 30  “‘Yai ta vanda kidimbu sambu na nge:* Mvula yai beno ta dia bima yina ke yela yo mosi; mpi na mvula ya zole, beno ta dia mbuma yina yo ta basisa;* kansi na mvula ya tatu beno ta kuna nkeni mpi ta katula bima na bilanga, mpi beno ta kuna bilanga ya vinu mpi ta dia mbuma na yo.+ 31  Bantu ya nzo ya Yuda yina ta guluka, bayina ta bikala,+ bo ta basisa misisa na nsi mpi bo ta buta mbuma na zulu. 32  Sambu bantu yina ta bikala ta basika na Yeruzalemi mpi bantu yina ta guluka ta basika na Ngumba ya Sioni.+ Kikesa ya Yehowa ya makesa ta sala diambu yai.+ 33  “‘Yo yina, yai mambu Yehowa ke tuba sambu na ntotila ya Asiria:+ “Yandi ta kota ve na mbanza yai,+Yandi ta losa ve tolo-tolo kuna,Yandi ta nwanisa yo ve ti kitaninu,Mpi yandi ta sala ve mwa ngumba ya ntoto sambu na kuziunga yo.”’+ 34  ‘Yandi ta vutuka na nzila yina yandi kwisilaka;Yandi ta kota ve na mbanza yai,’ Yehowa muntu me tuba. 35  ‘Mono ta nwanina mbanza yai+ mpi mono ta gulusa yo sambu na mono mosi+Mpi sambu na nsadi na mono Davidi.’”+ 36  Ebuna wanzio ya Yehowa basikaka mpi fwaka bantu 185 000 na camp ya bantu ya Asiria. Ntangu bantu telamaka na suka-suka, bo monaka bamvumbi+ yonso. 37  Yo yina Senakeribi ntotila ya Asiria kwendaka, yandi vutukaka na Ninive+ mpi bikalaka kuna.+ 38  Ntangu yandi vandaka kufukama na nzo* ya nzambi na yandi Nisroki, bana na yandi mosi Adrameleki ti Sharesere fwaka yandi na mbele ya bitumba,+ mpi bo tinaka na insi ya Ararati,+ ebuna mwana na yandi Esare-hadoni+ kumaka ntotila na kisika na yandi.

Banoti na nsi ya lutiti

To “nzo ya ntotila.”
To “ya mafingu.”
Na kisina, “me kwisa na munoko ya divumu.”
Na kisina, “mpeve mosi na kati na yandi.”
To mbala ya nkaka, “na kati-kati.”
To “tu-bamasa ya Nile.”
Na kisina, “salaka.”
To “salaka.”
Disongidila, Ezekiasi.
To “yina ta mena na bambuma yina bwaka.”
To “tempelo.”