Yezaya 23:1-18
-
Nsangu sambu na Tire (1-18)
23 Nsangu sambu na Tire:+
Beno dila, beno bamaswa ya Tarsisi!+
Sambu bo me fwa dibungu; muntu lenda kota na kati na yo ve.
Bo me zabisa bo yo katuka na insi ya Kitimi.+
2 Beno vanda pima, beno bantu ya insi yina kele na lweka ya nzadi-mungwa.
Bantu ya mumbongo ya me katuka na Sidoni,+ bayina me sabuka nzadi-mungwa, me fuluka na nge.
3 Nkeni* ya Shihore,*+Bima ya Nile, lufutu na yandi, lutaka na bamasa mingi,Mpi yo nataka luta ya makanda.+
4 Wa nsoni, O Sidoni, nge kisika ya ngolo ya lutaninu ya nzadi-mungwa,Sambu nzadi-mungwa me tuba nde:
“Mono me waka ve mpasi ya kubuta, mpi mono me butaka ve,Mono me sansaka mpi ve baleke ya babakala mpi me yedisaka ve baleke ya bankento.”*+
5 Bantu ta vanda na mpasi sambu na nsangu ya me tala Tire,+Bonso ntangu bo waka nsangu ya me tala Ezipte.+
6 Beno sabuka na Tarsisi!
Beno dila, beno bantu ya insi yina kele na lweka ya nzadi-mungwa!
7 Keti yai bwala na beno yina vandaka na kiese katuka ntama, katuka bilumbu na yandi ya ntete?
Makulu na yandi vandaka kunata yandi na bansi ya ntama sambu na kukwenda kuzinga.
8 Nani me baka lukanu yai sambu na kunwanisa Tire,Muntu ya ke pesaka bampu ya kimfumu,Yina bantu na yandi ya mumbongo vandaka bamfumu,Yina bakomersa na yandi vandaka bantu ya bo vandaka kupesa lukumu na ntoto ya mvimba?+
9 Yehowa ya makesa yandi mosi muntu me baka lukanu yai,Sambu na kuvweza lulendo yina yandi ke tula sambu na kitoko na yandi yonso,Sambu na kukulumusa bantu yonso yina bo vandaka kupesa lukumu na ntoto ya mvimba.+
10 O mwana-nkento ya Tarsisi, sabuka insi na nge bonso Nzadi ya Nile.
Kisika ya kusala mpi ya kuyidika bamaswa*+ kele diaka ve.
11 Yandi me tandula diboko na yandi na zulu ya nzadi-mungwa;Yandi me nikisa bimfumu.
Yehowa me tuba nde bo fwa bisika ya ngolo ya lutaninu+ ya Fenisia.
12 Ebuna yandi ke tuba nde: “Nge ta vanda diaka ve na kiese,+O muntu ya ke niokulaka bantu, mwana-nkento ya mwense ya Sidoni.
Telama, sabuka na Kitimi.+
Ata kuna nge ta baka ve ngemba.”
13 Tala! Insi ya bantu ya Kaldea.+
Bantu yango bo yai—yo vandaka ve Asiria+—Bo me kumisa yandi kisika sambu na bambisi yina ke zingaka na ntoto ya zelo na zelo.
Bo me tedimisa banzo-zulu na bo;Bo me bwisa bibaka ya banzo-zulu na yandi ya ngolo,+Mpi bo me kumisa yandi mayumbu.
14 Beno bamaswa ya Tarsisi, beno dila,Sambu bo me fwa+ kisika na beno ya ngolo ya lutaninu.
15 Na kilumbu yina, bo ta vila Tire bamvula 70, kiteso mosi ti nda ya luzingu* ya ntotila mosi. Na nsuka ya bamvula 70,+ mambu ta salama na Tire bonso na nkunga ya nkento ya ndumba:
16 “O nkento ya ndumba ya bo me vilaka, baka kidare, tambula-tambula na mbanza.
Bula kidare na nge mbote- mbote;Yimba bankunga mingi,Mpidina bo ta yibuka nge.”
17 Na nsuka ya bamvula 70, Yehowa ta tula dikebi na yandi na Tire, mpi yandi ta vutukila diaka kubaka lufutu na yandi mpi kusala kindumba ti bimfumu yonso ya nsi-ntoto ya kele na zulu ya ntoto.
18 Kansi luta na yandi mpi lufutu na yandi ta kuma kima mosi ya santu sambu na Yehowa. Bo ta bumba yo ve mpi ta tula yo ve na lweka, sambu lufutu na yandi ta vanda sambu na bantu yina ke zinga na ntwala ya Yehowa, mpidina bo ta dia tii kuna bo ta fuluka mpi ta lwata bilele+ ya kitoko.
Banoti na nsi ya lutiti
^ Na kisina, “Nkuna.”
^ Disongidila, kitini ya Nzadi ya Nile.
^ Na kisina, “bamwense.”
^ To mbala ya nkaka, “dibungu.”
^ Na kisina, “bilumbu.”
